MILIONI 41.6 za mikopo, zatolewa Wilayani Nyasa

Posted on: September 1st, 2021

Halmashauri ya Wilaya ya Nyasa jana Agosti 31, imetoa Tsh milioni 41.6  kwa ajili ya  kukopesha vikundi 14 vya wajasilamali, wanawake, vijana na walemavu ikiwa ni asilimia kumi (10%) ya mapato ya ndani ya Halmashauri kwa Mwaka wa Fedha 2020/2021.

Akiongea na wanufaika wa mikopo hiyo ofisini kwake, Mkurugenzi Mtendaji Wilaya ya Nyasa, Ndugu Jimson Mhagama amewataka wanavikundi,  kuzitumia fedha hizo vizuri kwa ajili ya kuboresha shughuli mbalimbali za kiuchumi, ili waweze kuzirudisha kwa wakati kwa kuwa fedha hizo ni za Selikali na hutolewa bila Riba, na zinatakiwa kurudishwa kwa kufuata mkataba.

“Halmashauri imetoa mkopo kwenu, mnatakiwa kuutumia vizuri kwa kuboresha biashara zenu na sio kutumia kwa mambo yenu binafsi,na Fedha hizi zinatakiwa kurudishwa ili ziweze kutolewa kwa vikundi vingine na zimeshaingizwa kwenye akaunti zenu benki”.Alisema.

Mhagama amefafanua kuwa, Halmashauri ya Wilaya ya Nyasa, kwa mwaka wa Fedha wa 2020/2021, imetoa mikopo yenye thamani ya Tsh milioni 41.6 kwa vikundi 14  vya wanawake,Vijana na Walemavu kwa mchanganuo ufuatao, wanawake (milioni 19) Vijana (milioni 15.6) na walemavu ni (milioni 7)

Amevitaja Vikundi vya wanawake vilivyopewa mikopo hiyo kuwa ni wanawake,Muungano (Kata yaLipingo ), Mtendele (Kata ya Liuli), Amini (Kata ya Kilosa), Jemaje (Kata ya Tingi), Upendo kihurungu (Kata ya Mpepo) na Uwakili (Kata ya Lituhi).

Vikundi vingine vilivyo pewa mkopo ni vikundi vya vijana ambavyo ni Amasa Group kata ya Lipingo ,Likwilu Youth Agro Group kata ya Kilosa,Ndanda Group kata ya Kingerikiti, Fahari Yetu kata ya Kihagara, Muungano Development Fun MODEF kata ya luhangarasi na Kisasa kata ya Luhangarasi.

Kundi la mwisho ni kundi walemavu ambalo fedha zimegawanywa kwa vikundi vya kata mbili ,vikundi hivyo ni Walemavu Ndondo, kata ya Liparamba na Tukomboe kata ya Kihagara.

Ametoa wito kwa wananchi wa kata zote za wilaya ya nyasa kuunda vikundi vya wajasiriamali iliwaweze kufanya biashara zao.

Baadhi ya wanufaika wa mikopo hiyo,wameipongeza Halmashauri ya Nyasa kwa kuwapatia mikopo hiyo kwa sababu inawasaidia katika shughuli za kuendeleza biashara zao,kwa kuwa walikuwa na uhitaji.

“Tunafurahi kwa kupata mkopo huu kwasababu unatunufaisha sana,na kupitia mkopo huu utanisaidia katika shughuli za uvuvi wa samaki na dagaa na baadae ufugaji” alisema mwenyekiti wa kikundi cha walemavu kata ya Kihagara, bwana Casper Ndimbo.”

Imeandaliwa na Netho c. sichali na Lilian Ngwavi (UoI)

Afisa habari Nyasa dc

0767417597