DKT.SAMIA AMWAGA TENA MAMILIONI YA MIRADI NYASA

Posted on: July 10th, 2025

-Aridhia milioni 748.1 kujenga miundombinu ya elimu msingi na awali 

-Milioni 314 kujenga shule mpya ya msingi Limbo

Na Byarugaba Innocent, Nyasa DC

Halmashauri ya Wilaya ya Nyasa Julai 1, 2025 imepokea fedha za Miradi zaidi ya shilingi za kitanzania Milioni 748.1 kutoka serikali kuu kupitia mradi wa kuboresha upatikanaji wa fursa  sawa katika ujifunzaji bora wa elimu awali na msingi Tanzania (BOOST)

Rais wa Jamhuri ya Muungano wa Tanzania Mhe. Dkt. Samia Suluhu Hassan ameridhia fedha hiyo kiasi cha shilingi 748,158,910 zitumike kwenye ujenzi wa miundombinu ya shule za msingi na awali Wilaya ya Nyasa ili kuimarisha zaidi ujifunzaji kwa kuweka mazingira wezeshi

Kaimu mkuu wa divisheni ya Mipango na Uratibu Aliko Anthony Mwabukusi ameeleza kuwa fedha hiyo itatumika kukarabati majengo chakavu, kujenga shule mpya, Kujenga nyumba  ya Mwalimu, kujenga madarasa  na kujenga Matundu ya Vyoo kwenye maeneo husika

Aidha, Mwabukusi amezitaja kata zilizopokea fedha kuwa ni Kilosa kwa ajili ya ukarabati wa shule ya Msingi Kilosa shilingi 153,458,910 pamoja na ujenzi wa shule mpya ya Msingi Limbo ambapo kiasi cha shilingi 314,000,000 kimetolewa

Kata nyingine ni Chimate iliyopokea shilingi 154,200,000 kujenga vyumba 2 vya Madarasa, Matundu 6 ya vyoo pamoja na nyumba ya mtumishi ya familia mbili.

Mwabukusi ameongeza kuwa Kata ya Kingerikiti  imepokea shilingi 59,200,000 kujenga vyumba 2 vya madarasa na Matundu 6 ya vyoo shule ya msingi Ukuli. Aidha, Kata ya Lipingo imepokea shilingi 67,300,000 kujenga Madarasa 2 na Matundu 6 shule ya Msingi Lipingo.

Mkurugenzi mtendaji wa Halmashauri ya Wilaya ya Nyasa Khalid A. Khalif amemshukuru Rais wa Jamhuri ya Muungano wa Tanzania Mhe. Dkt. Samia Suluhu Hassan kwa kuendelea kuiheshimisha Nyasa kwa kutoa fedha hiyo kuimarisha zaidi miundombinu ya Elimu na kuahidi kuisimamia kwa weledi mkubwa, ikamilike kwa wakati kwa viwango bora vinavyolingana na thamani ya fedha  iliyotumika  ili ianze  kutoa huduma bila kuathiri mipango na malengo ya serikali

Khalid ametoa rai kwa wkandarasi, Wazabuni na wananchi kufanyakazi kwa ushirikiano ili kukamilisha miradi kwa manufaa ya jamii yetu kwani uwekezaji mkubwa unaofanywa na serikali yetu katika sekta ya elimu tunapaswa kuunga mkono kwa vitendo

Halmashauri ya Wilaya ya Nyasa ina jumla ya shule za Msingi 117 za Serikali na kukamilika kwa shule ya Msingi Limbo kutaongeza idadi na kufikia 117.