UTEKELEZAJI KAMPENI YA CHANJO YA MIFUGO YAANZA NYASA

Posted on: July 12th, 2025

Na Byarugaba Innocent, Nyasa DC

Halmashauri ya Wilaya ya Nyasa imeanza zoezi la utoaji wa chanjo za Mifugo kwenye kata kwa lengo la kutokomeza majonjwa ya mlipuko yanayoiandama Mifugo ifugwayo ikiwa ni mpango mkakati wa Serikali ya Jamhuri ya Muungano wa Tanzania wa kutokomeza magonjwa hayo kutoka asilimia 21 hadi 70.

Afisa mifugo wa Halmashauri ya Wilaya ya Nyasa Dkt. Jacob Stephen Madondolah ameeleza kuwa zoezi limeanza mapema Juni 29, 2025 na linaendelea kwenye kata 15 kati ya 20 ambapo jumla ya kuku 165,624 wanategemea kupata chanjo dhidi ya  magonjwa ya Kideri, Mafua na Ndui ikiwa ni utekelezaji wa sheria ya afya ya Mifugo Na.17 ya Mwaka 2003

Aidha, Dkt. Madondolah ametoa rai kwa wafugaji kutoa ushirikiano kwa wataalam wa chanjo kwenye  maeneo yao ili kufanikisha zoezi la uchanjaji linalolenga kuboresha afya za Wanyama na kuongeza thamani  ya mazao ya mifugo sokoni yatokanayo na mifugo hiyo.

Dkt. Madondolah amezitaja kata zinazoendelea na zoezi la uchanjaji kuwa ni Lituhi, Liuli, Liparamba, Tingi, Mpepo, Lipingo, Linga, Upolo, Ngumbo, Kihagara, Luhangarasi, Liwundi, Mbaha, na Mipotopoto na kwamba zoezi litaendelea kwa kata zote 20 za Halmashauri ya Wilaya ya Nyasa.

Zoezi la uzinduzi wa chanjo na utambuzi wa Kitaifa ulifanyika tarehe 16 Juni, 2025 kwenye kata ya Nyakabindi Mkoani Simiyu ambapo mgeni rasmi alikuwa Rais wa Jamhuri ya Muungano wa Tanzania Mhe. Dkt. Samia Suluhu Hassan huku ikichagizwa na kauli mbiu isemayo “Tokomeza Magonjwa ya Mifugo ili kuongeza uzalishaji na kuwezesha bidhaa ya mifugo na Mazao yake ndani na nje ya nchi”

Kwa mujibu wa takwimu za Mifugo kutoka divisheni ya Kilimo,Mifugo na Uvuvi,Halmashauri ya Wilaya ya Nyasa ina jumla ya Ng’ombe 22,883, Mbuzi 39,585, Kondoo 5,664 na Kuku 165,624.