MAKUNDI SOGOZI YA WHATSAAP YAPASWA KUJADILI MAENDELEO

Posted on: July 12th, 2025

• JUBILEI YA MIAKA 50 SHULE YA MSINGI NGINGAMA YALETA NEEMA
• ‘WAJUBILANT’ WATOA FADHILA KWA KUKARABATI MADARASA CHAKAVU

Na Byarugaba Innocent, Nyasa DC

Watanzania wameaswa kuyatumia makundi ya WhatSaap kujadili mambo ya maendeleo kuanzia ngazi ya kaya, Jamii na Taifa tofauti na uhalisia uliopo hivi sasa ambapo makundi mengi yamekuwa yakitumia muda mwingi kujadili mambo yasiyokuwa na tija pengine kuwa sehemu ya kuchochea tabia na mienendo isiyofaa katika jamii.

Rai hiyo imetolewa na Aidani Ndomba mwenyekiti wa kamati  iliyokarabati jengo moja la shule ya Msingi Ngingama lenye vyumba viwili vya madarasa na ofisi ya walimu kupitia  kundi la WhatSaap lililotumika kuwaunganisha wanafunzi waliosoma shule hiyo miaka 50 iliyopita  tangu kuanzishwa kwake mwaka 1975-2025

“…kupitia kundi la WhatSaap tuliona kuna haja ya kuleta fadhila, tukahamasishana kuchangia kidogo kidogo kila mtu alichoweza na kupata shilingi milioni 7.5 iliyotumika kununua vifaa na wengine wakachangia ufundi, tumefanikiwa. Suala la elimu si jukumu la serikali pekee, tunaona serikali imekuwa ikifanya pakubwa nasi kama jamii inatupasa kuongeza nguvu kwa kuunga mkono juhudi za Serikali yetu”… amesema Ndomba

Jubilei ya miaka 50 (1975-20250 shule ya msingi Ngingama ikiitikiwa na Elimu ni ufunguo wa Maisha ni kauli mbiu yenye lengo la  kuwakumbusha wananchi wa  Vijiji vya Lukali, Kiogo na Ngingama kuendelea kuikumbatia elimu na kamwe kutokubali kuwaozesha mabinti ama kuwapeleka machungani vijana wa kiume kwani kupitia elimu tunapata wataalam wanaolitumikia taifa lao.

Makamu mkuu wa chuo kikuu cha Jordani kilichopo Mkoani Morogoro Profesa Betram Mapunda  ni miongoni mwa wazawa walioshiriki Jubilei hiyo ambapo ametoa wito kwa wazazi, walezi na jamii nzima kuendelea kuhamasika na kuwekeza kwenye elimu kwani jamii ama taifa lisilokuwa na wataalam halina uhai kimaendeleo

Thadei Chale Mwalimu Mkuu na Christoms Mahundi kiranja mkuu wa shule ya msingi Ngingama wameiomba serikali kuwaongezea walimu, kujenga jengo la kujisitiri watoto wa kike pamoja na kuwaongezea vifaa vya kujifunza na kujifunzia hususan wa Ki-TEHAMA kwani dunia ya leo inajifunza kwa vitendo zaidi.

Kwa upande wake kaimu Mkurugenzi mtendaji wa Halmashauri ya Wilaya ya Nyasa Hamis Mkele aliyekuwa mgeni rasmi amewapongeza sana wananchi wa Ngingama, Lukali na Kiogo waliosoma shule hiyo hasa wanaoishi nje ya Wilaya ya Nyasa, Mkoa wa Ruvuma kwa ushirikiano, Upendo na utashi wa kukumbuka walikotoka na kuamua kurudi nyumbani kutoa fadhila kwenye kumbukizi ya Jubilei ya dhahabu ya miaka 50 tangu kuanzishwa kwake.

Aidha, amesema serikali inatambua na kuthamini mchango wao na kwamba katika bajeti ya 2026/2027 watawajengea miundombinu waliyoomba sanjali na kuongeza walimu kwa mujibu  wa ikama.

Sherehe hii ya maadhimisho ya miaka 50 ya Jubilei ya dhahabu iliadhimishwa kwa wananchi wote kula, kunywa huku ikipambwa kwa ngoma maarufu za asili kama  Muganda, Kioda na Mahalamisi.