DC MAGIRI AZINDUA RASMI BODI YA MAJI WILAYA YA NYASA

Posted on: July 12th, 2025

• ASISITIZA UTENDAJI WENYE TIJA

Na Byarugaba Innocent, Nyasa DC

Mkuu wa Wilaya ya Nyasa Mhe. Peres Magiri amezindua rasmi bodi ya Maji safi na Usafi wa Mazingira Wilaya ya Nyasa -MBAUWASA sambamba na kugawa vitendea kazi  ikiwemo Sheria ya Maji Na.5 ya Mwaka 2019 na kanuni zake huku akisistiza  weledi na uzalendo kwa watumishi wa bodi hiyo ili kufanikisha adhima ya kuwahudumia Wananchi.

Mhe. Magiri ametoa rai hiyo kwa wajumbe wa bodi ya MBAUWASA waliochaguliwa kujipanga vizuri na kufanyakazi kwa bidii, ubunifu, weledi na ushirikiano ili kuifanya mamlaka  kujiendesha  kwani bila kufanya hivyo itafutwa na yeye kama kiongozi wa Wilaya tena mteule  wa Mhe. Dkt. Samia Suluhu Hassan, Rais wa Jamhuri ya Muungano wa Tanzania  hayupo tayari kuona ikifutwa mikononi mwake

Mkurugenzi mtendaji wa MBAUWASA Mhandisi John Guseseka amesema kuwa mamlaka ya Maji na Usafi wa Mazingira Mbamba-Bay ilianzishwa rasmi mwaka 2018 ikiwa daraja C na kutangazwa  kwenye gazeti la Serikali la tarehe 2 Machi, 2018 No.67 huku eneo la huduma  likibainishwa kuwa ni Kata tatu za Mbamba-Bay, Kilosa na Mtipwili  na gharama za uendeshaji ikiwa ni makusanyo yake ya maduhuli ya maji na uwekezaji mkubwa wa miundombinu kutoka Serikali Kuu.

Mhandisi Guseseka ameongeza kuwa tayari Waziri wa Maji Mhe. Jumaa Hamidu Aweso ameteu bodi ya MBAUWASA tangu tarehe 12 Februari, 2025 itakayohudumu kwa kipindi cha  miaka mitatu mpaka tarehe 11 Februari, 2028 kwa kuhakikisha hudma ya Maji  inapatikana muda wote na inakuwa endelevu.

Wajumbe walioteuliwa  ni Stanley Vumu ambaye ni Mwenyekiti, Asifiwe Salum anayewakilisha kundi la watumia Maji, Dkt. John Papalika anayewakilisha kundi la wafanyabiashara, Veronica Simba mwakilishi kundi la wanawake na Leslie Kadambe anayewakilisha kundi la watumia maji wakubwa  huku Mkurugenzi Mtendaji wa Halmashauri ya Wilaya ya Nyasa na Mkurugenzi Mtendaji wa MBAUWASA wakiingia kwa nyadhida zao.

Katibu wa Chama cha Mapinduzi Wilaya ya Nyasa Acheni Mwinshehe ametoa rai kwa wenyeviti wa vijiji  na vitongoji kusimamia utaratibu na kutoa elimu kwa wananchi ya ulipiaji huduma ya Maji ili kuiwezesha Mamlaka Kujiendesha huku akiwaasa kamwe kutokuwa sehemu ya kukwamisha juhudi za Serikali za kufikisha huduma za Maji kwa Wananchi.

Mwenyekiti wa MBAUWASA Stanley Vumu amejinasibu mbele ya Mkuu wa Wilaya kuwa wajumbe walioteuliwa wapo kikazi zaidi na kuahidi kuwa watafanyakazi ya kuisimamia  mamlaka kwa weledi, Ushirikiano kwa kuzingatia Sheria, Kanuni, taratibu na miongozo iliyopo na kwamba ameyapokea maelekezo yote ikiwemo kuongeza na kutanua mtandao wa Maji kutoka kata tatu zilizoanishwa sasa na kupandisha upatikanaji wa maji kutoka asilimia 68 mpaka 85

Mkuu wa Wilaya ya Nyasa Mhe. Peres Magiri ametumia fursa hiyo kuwakumbusha Wananchi kushiriki kikamilifu kwenye uchaguzi Mkuu, 2025 unaotarajia kufanyika Mwezi Oktoba huku akiwataka Wananchi wa Wilaya ya Nyasa kumchagua kwa kumpa kura za kishindo Mhe. Dkt. Samia Suluhu Hassan kwa utendaji wake bora ikiwemo kuleta miradi mingi ya maendeleo Wilaya ya Nyasa