ZIARA YA NAIBU WAZIRI WA AFYA,MAENDELEO YA JAMII,JINSIA,WAZEE NA WATOTO MH. HAMISI KIGWANGALLA (MB), WILAYANI NYASA

Posted on: July 15th, 2017

Naibu Waziri wa Afya ,Maendeleo ya Jamii, Jinsia, Wazee na Watoto Mh. Dkt. Hamisi Andrea Kigwangalla Tarehe 15-07-2017 amefanya ziara ya kutembelea Wilaya ya Nyasa na kuzungumza na Wananchi wa Mji wa Mbamba bay.

Kabla ya kufanya Mkutano na wananchi wa Mbamba bay Naibu Waziri alifika ofisi ya Mkuu wa Wilaya ya Nyasa iliyopo eneo la Kilosa na kusomewa Taarifa ya Maendeleo ya Wilaya ya Nyasa. Akisoma taarifa hiyo Mkuu wa Wilaya ya Nyasa Mh. Isabella Chilumba alimwambia Naibu waziri kuwa Wilaya kwa kushirikiana na Mh.Mbunge wamejitahidi kuboresha huduma za afya katika kituo cha afya cha Mbamba bay ili kuwaondolea adha wananchi hasa wakati huu ambao Mji unakua kwa kasi ambapo katika siku za hivi karibuni tumeweza kujenga jengo la Upasuaji na Wodi ya akina mama wajawazito na huduma za upasuaji zimeanza kutolewa baada ya kuzinduliwa na Mwenge wa Uhuru tarehe 07-05-2017.

Aidha Wilaya imekuwa ikikabiliana na changamoto kadhaa katika utoaji wa huduma za afya ambapo alimwambia Naibu Waziri changamoto hizo ni pamoja na Ukosefu wa Hospitali ya Wilaya, Ukosefu wa Magari ya kutosha kwa ajili ya Wagonjwa na shughuli mbalimbali za idara ya Afya .

Akizungumza na wakazi wa Mbamba bay Dkt. Kigwangalla aliwashukuru wananchi kwa ukarimu wao na kwa mapokezi mazuri, lakini pia aliwashukuru kwa kuendelea kumuunga mkono Rais wa Jamhuri ya Muungano wa Tanzania Mh. Dkt. John Pombe Magufuli kwa shughuli anazoendelea kuzifanya kwa manufaa ya wananchi ya Tanzania, aidha alimpongeza Mbunge wa Nyasa na Naibu Waziri wa Elimu na Mafunzo ya Ufundi Eng.Stella Manyanya  kwa namna anavyoshirikiana na wananchi wake katika kuhakikisha Nyasa inakuwa na maendeleo .