YALIYOJIRI Zira ya mhe. Mkuu wa Wilaya ya Nyasa kata ya Lumeme

Posted on: March 11th, 2025

Mkuu wa Wilaya ya Nyasa Mhe. Peres Magiri Afanya Ziara ya Kikazi Katika Kata ya Lumeme

Mkuu wa Wilaya ya Nyasa, Mhe. Peres Magiri, amefanya ziara ya kikazi katika Kata ya Lumeme, ambapo ametembelea vijiji vya Kikole na Lindi, wilayani Nyasa. Lengo kuu la ziara hii ilikuwa ni kusikiliza na kutatua kero za wananchi.

Akiwa katika kijiji cha Kikole, Mhe. Magiri amekagua ujenzi wa madarasa matatu yaliyojengwa kwa nguvu za wananchi. Amewataka wananchi kuendeleza juhudi zao katika ujenzi huo na pia kutoa wito wa kuanzisha harambee ili kukamilisha ujenzi wa madarasa hayo.

"Serikali inaunga mkono jitihada hizi, na tutahakikisha kuwa kila juhudi inafanyika ili kukamilisha miradi hii kwa manufaa ya watoto wetu," alisema Mhe. Magiri.

Mkuu wa Wilaya pia amekubali kero za wananchi, wakiwemo ambao walilalamikia ukosefu wa umeme katika vitongoji vyao. Amesema kuwa Serikali imejizatiti katika kutekeleza mpango wa kupeleka umeme katika kila kijiji, huku akiongeza kuwa awamu inayofuata itahusisha vitongoji. Aidha, ameeleza kuwa kero ya barabara kutoka kilosa-mtipwili- Lumeme pia itapatiwa ufumbuzi kwa haraka.

Katika kijiji cha Lindi, wananchi walimpongeza Mhe. Magiri kwa kutembelea kijiji hicho, kwani amekuwa kiongozi wa kiserikali kuja kwa mara ya kwanza tangu uhuru. Walitaja hatua zilizochukuliwa na Serikali katika kutatua changamoto zao, ikiwemo ujenzi wa barabara, kuleta umeme,ujenzi wa shule na kuboresha mawasiliano ya simu kwa kufika mtandao wa simu wanaishukuru sana serikali.

 Hata hivyo, wananchi hao wameeleza changamoto zilizobaki, ikiwa ni pamoja na ukosefu wa zahanati na maji, huku wakisema wanaimani kuwa Serikali itatatua changamoto hizo kama ilivyofanikiwa kutatua zile changamoto kubwa za umeme, barabara, na mawasiliano.

Mhe. Magiri ametoa wito kwa wananchi wa Nyasa kufanya kazi kwa bidii, kulinda amani, na kuwa wazalendo kwa kuipenda nchi yao. Aliwashauri pia kushiriki kwa kiasi kikubwa katika shughuli za ujenzi wa taifa ili kuhakikisha maendeleo yanapatikana kwa kila mmoja. Amewataka kuwa kwa umoja na juhudi za pamoja, changamoto zote zinazowakabili wananchi zitapatiwa ufumbuzi wa kudumu.

Ziara hii ya Mhe. Magiri inadhihirisha dhamira ya Serikali ya kuhakikisha maendeleo yanawafikia wananchi wote, huku ikizingatia mahitaji yao ya msingi.