WILAYA YA NYASA YAWAAPISHA NA KUWAPA MAFUNZO VIONGOZI WAPYA WA SERIKALI ZA MITAA

Posted on: November 26th, 2019

Halmashauri ya Wilaya ya Nyasa mkoani Ruvuma imeanza kuwaapisha na kuwapa mafunzo, viongozi wa Serikali za mitaa waliochaguliwa katika uchaguzi uliofanyika novemba 24 mwaka huu.

Zoezi la Viongozi hao kula kiapo na mafunzo ,  yanafanyika katika kila Makao makuu ya Kata husika, na wakili Loveness gwimile anawaapisha  kiapo cha utii na kutunza siri.

Kaimu Afisa uchaguzi wa Halmashauri ya Wilaya ya Nyasa Onesmo Mkandawile amesema kuwa kula kiapo kwa viongozi hao wa Serikali za Mitaa, ni Matakwa ya kisheria za uchaguzi wa Serikali za mitaa,ya mwaka 2019.  viongozi hao ili waweze kuanza kufanya kazi,  ni lazima waape ili waweze kutekeleza majukumu yao kwa kufuata taratibu, kanuni, na sheria.

“Ndugu viongozi zoezi hili la kuwaapisha na matakwa ya kisheria ,hivyo kila kiongozi aliyechaguliwa anatakiwa aape kabla ya kuanza kutekeleza majukumu yake .Kiongozi yeyote asiyeapa hataruhusiwa kufanya kazi au kutekeleza majukumu yake”.alisema Mkandawile.

Aliongeza kuwa pamoja na kuapa wameona kama Halmashauri watoe pia  mafunzo, yatakayowawezesha kutekekeleza majukumu yao ipasavyo. Lengo kuu la mafunzo hayo ni kuwajengea uwezo  viongozi hao ili waweze kutatua changamoto mbalimbali za wananchi na kuwaunganisha ili waweze kutekeleza miradi ya maendeleo katika vijiji vyao.

Viongozi  wa vijiji wameipongeza Halmashauri ya Nyasa kwa kuwapa mafunzo elekezi na kuahidi kuwa watayatumia vizuri na watashirikiana na Halmashauri katika kuwahudumia wananchi wa Wilaya ya Nyasa.

Zoezi la kuwaapisha na Mafunzo,  yamefanyika,  katika kata ya Mbamba-bay, Kilosa, Mtipwili, Chiwanda, Lipingo, Liuli, na Kihagara.Kesho  zoezi hili litaendelea katika Kata ya Liwundi, Ngumbo,Mbaha na Lituhi.

Aidha kwa mujibu wa Kaimu Afisa uchaguzi  Bw. Mkandawile amesema mpaka jumamosi Halmashauri itakuwa imewaapisha Viongozi wote  wa vijiji waliochaguliwa Katika wilaya ya Nyasa.