Wilaya ya Nyasa yaadhimisha siku ya Sheria,DC Nyasa ajitambulisha na kutoa Wito kwa wakazi wa Nyasa

Posted on: February 1st, 2023

YALIYOJIRI SIKU YA SHERIA WILAYA YA NYASA

WILAYA ya Nyasa tarehe 1/02/2023 imeadhimisha siku ya Sheria iliyofanyika katika Ukumbi wa Kepten John Komba  uliopo Mbambabay Wilayani Nyasa.

Mgeni Rasmi katika Maadhimisho hayo ni Mkuu wa Wilaya ya Nyasa Mh,Filbetho Hassan Sanga, aliyezungumza kwa mara ya kwanza na wananchi wa Wilaya ya Nyasa  tangu kuteuliwa kwake na Rais Samia Suluhu Hassan kuwa Mkuu wa Wilaya ya Nyasa.

Akizungumza Katika maadhimisho hayo amewataka wananchi wa Wilaya ya Nyasa kutumia njia ya usuluhishi wa Viongozi wa Dini,Serikali na wazee, kutatua migogoro mbalimbali inayotokea katika jamii kabla ya kwenda mahakamani na kuhakikisha usalama unakuwepo katika wilaya yetu.

Ameongeza kuwa Viongozi wa Dini,Serikali na wazee ni watu muhimu katika jamii hivyo wanatakiwa kumaliza migogoro inayojitokeza katika jamii kwa kuwa kufanya hivi kunapunguza gharama na kuifanya jamii kuwa yenye maelewano.

Aidha amewataka viongozi hao kuhakikisha wanafunzi wote waliochaguliwa kujiunga na elimu ya Sekondari, wanajiunga mara moja.amewapongeza wakazi wa Wilaya ya Nyasa kwa kuwa na amani na kuwataka kuendelea kuwa na amani kwa kutoruhusu wahamiaji haramu, kuingia katika nchi yetu,Aidha amewataka wananchi wa Wilaya ya Nyasa kumpa ushirikiano kwa kuchapa kazi kwa bidii, nae yupo tayari kutoa ushirikiano wa hali ya juu utakaohitajika.

Awali akitoa Taarifa ya maadhimisho ya wiki ya Sheria Wilaya ya Nyasa Hakimu Mfawidhi wa Mahakama ya Wilaya ya Nyasa Mh.Osmund Kapinga, amesema Maadhimisho haya yanalenga  kutoa Elimu ya Sheria kwa wananchi na kufungua mwaka wa kazi wa kimahakama na amesema mada mbalimbali zimetolewa kwa wananchi zikiwepo mada za ndoa,umiliki wa ardhi, na kutumia njia ya usuluhishi kabla ya kwenda mahakamani.

Aidha ameitaja kauli mbiu ni “Umuhimu wa utatuzi wa migogoro kwa njia ya usuluhishi katika kukuza uchumi endelevu,wajibu wa mahakama na wadau”.