WILAYA ya Nyasa yaadhimisha Muungano kwa kufanya shughuli za kijamii

Posted on: April 26th, 2022

Tarehe 26.04.2022, Wilaya ya Nyasa imeadhimisha Sikukuu ya Miaka 58, ya   Muungano wa Tanzania  kwa kufanya shughuli mbalimbali za kijamii Wilayani hapa.

 Mkuu wa Wilaya ya Nyasa, Kanali Laban Thomas amewaongoza mamia ya wananchi wa   wilaya ya Nyasa kusheherekea, kwa kufanya Usafi wa Kufyeka nyasi katika barabara za Samia Suluhu Hassan inayoanzia Ofisi ya Mkurugenzi Mtendaji Wilaya ya Nyasa hadi Ofisi ya Mkuu wa Wilaya ya Nyasa kwa upande wa Kata ya Kilosa, wakati Kata ya Mbamba bay wananchi wameshiriki kufanya Usafi katika Viwanja vya Polisi, barabara ya Mzunguko na Viwanja vya Ofisi ya Mbunge wa Jimbo la Nyasa.

Aidha shughuli nyingine iliyofanyika ni kupanda miti katika eneo la Ofisi ya Mkuu wa Wilaya ya Nyasa, na miti iliyopandwa ni Mitiki pamoja  na kuchangia Damu.

Akizungumza na wananchi wakati wa  maadhimisho hayo Mkuu wa Wilaya ya Nyasa Kanali Laban Thomas amewataka wananchi kuenzi Muungano kwa kulinda amani na kuyatunza mazingira yanayozunguka katika kila Nyumba.

Aidha ametoa agizo la kumtaka kila mwananchi katika Nyumba yake, kuhakikisha anafanya  Usafi wa mazingia na kupanda miti.

Sherehe hizo zimehudhuriwa na Viongozi wa Chama na Serikali,Wakuu wa Taasisi,Wakuu wa Idara Watumishi na wananchi.