WAZIRI MWAKYEMBE. Uandishi wa habari sio kimbilio la waliofeli

Posted on: August 17th, 2020

WAZIRI wa Habari, Sanaa,Utamaduni na Michezo Dkt.Harrison Mwakyembe hivi karibuni amefanya ziara ya kikazi mkoani Ruvuma na kuzungumza na wadau wa Habari katika ukumbi wa Mipango uliopo ofisi ya Mkuu wa Mkoa mjini Songea.

Katika ziara yake Waziri Mwakyembe ametembelea maeneo ya kihistoria yakiwemo Makumbusho ya Taifa ya Majimaji  kutembelea mitambo ya  TBC  Kanda ya ziwa Nyasa,vituo viwili vya redio binafsi vya Jogoo na Key FM na hatimaye kuzungumza na wadau wa habari.

Akizungumza na wadau wa habari,Waziri Mwakyembe amesema kwa muda mrefu wanahabari hapa nchini wamedharauliwa na kukosa haki zao za msingi wanazostahili kupata kama wanahabari.

“Mimi ni mwanahabari mwenzenu, nimekulia humo potelea mbali anayeficha kidonda haponi,Hii tasinia inawezesha nchi na Demokrasia kufanya kazi,imekuwa ni kimbilio la mtu anayefeli duniani,uandishi wa habari siyo wa kupokea makapi’’,amesisitiza Mwakyembe.

Waziri wa Habari ameongeza kuwa Mwandishi ni mwalimu,ni mkalimani,ni mfasili na  mchambuzi wa masuala mbalimbali na kwamba mtu yeyote  ambaye hakidhi vigezo siyo mwandishi wa habari.

Hata hivyo amekiri kuwa hapo awali makosa yalifanyika kwa kuichukulia fani ya uandishi wa habari ni kama makapi ya wanaofeli ambapo mwaka 2016 iliundwa sheria  na kwamba katiba inatambua uandishi wa habari ni taaluma,na kazi ya uandishi wa habari ni hatari na inampasa mwanahabari  kuwekewa Bima,pia aingizwe kwenye mifuko ya hifadhi ya mifuko ya Taifa.

“Sheria ya habari imeundwa  baraza Huru la Habari tulejee kwenye Misimamo tumeunda kamati ya Baraza itakuwa na mamlaka kama mahakama tumegundua bila serikali kuingiza pesa kwenye mifuko yao wengi watashindwa kusoma na kilele chake  mwaka 2021 wanahabari tutakao anza nao kazi 2022 watakuwa wana elimu kuanzia Diploma na Degree’’,alisema.

“Siyo kwamba sina huruma, nina huruma sana,kuna watu wana uzoefu mkubwa lakini hawana Elimu inayotakiwa vijana wote wadogo hakikisheni mnakimbia kwenda kusoma”,alisisitiza Waziri wa Habari.

Katika hatua nyingine Waziri Mwakyembe amekoshwa    shule ya Ruhuwiko Sekondari  iliyopo Songea Mjini kwa kufanya vizuri katika michezo ya UMISETA kitaifa iliyofanyika mwaka 2019 mkoani Mtwara.

Kaimu Afisa Michezo Mkoa wa Ruvuma Anzawe Chaula amesema  mafanikio waliyopata  Kuimarisha Michezo kwa Shule za Msingi na Sekondari  ngazi ya mkoa, ambapo katika mashidano ya UMISETA taifa mwaka 2019  timu ya mpira wa miguu ya mkoa wa Ruvuma iliibuka kinara kitaifa  na kuchangia golikipa bora ambaye aliweza kwenda kushiriki mashindano ya  Afrika Mashariki yaliyofanyika nchini Kenya.

Kwa upande wake Mkurugenzi wa Idara ya Ufundi TBC Mhandisi Upendo Mbele amesema usikivu wa  TBC Taifa KATIKA Mkoa wa Ruvuma kwa sasa ni mzuri tukilinganisha na miaka ya 80 ambapo mitambo yake ilichakaa  na usikivu ulikuwa ni hafifu.

Amesema Serikali  kupitia shirika lake la utangazaji  ilimeamua kuweka mitambo mingine mipya ya FM ambapo hadi sasa katika nchi nzima kuna mitambo 67.