WAZAZI NYASA WATAKIWA KUCHANGIA CHAKULA MASHULENI

Posted on: July 6th, 2020

Katibu wa  jumuiya ya wazazi CCM, Wilaya ya Nyasa  Abdul Sikitiko amewataka wazazi  wa Wilaya ya Nyasa, kuchangia chakula na kuhakikisha wanafunzi wote wananakula shuleni  ili waweze kusoma kwa bidii.

Ameyasema hayo hivi karibuni, wakati akikagua maendeleo ya elimu toka shule zifunguliwe na kuona ni namna gani wanafunzi wanafundishwa ili kujihadhari na ugonjwa wa Corona, pamoja na kukagua  miradi ya elimu katika shule za Sekondari Limbo, lundo na shule za msingi Likwilu na Mwongozo  Wilayani hapa, ili kubaini changamoto zinazowakabili walimu na wanafunzi na jamii inatatuaje changamoto hizo.

Bw,Sikitiko alifafanua kuwa hajaridhishwa na wanafunzi kutokula shuleni, kwa kuwa kila shule aliyopita wanafunzi walikuwa hawana utaratibu wa kula shuleni, hali inayosababisha wanafunzi wengi kukaa na njaa shuleni, na wengine kuletewa chakula shuleni na wazazi wao, na wasioletewa wanakaa bila kula tangu asubuhi mpaka jioni hali ambayo inawafanya kutoweza kuhimili masomo.

Aliongeza kuwa Serikali ya Jamhuri ya Muungano wa Tanzania imewapunguzia mzigo wa hali ya juu wazazi , kwa kutoa elimu bila malipo kuanzia darasa la awali hadi kidato cha nne. Wazazi majukumu waliyonayo ni kuhakikisha watoto wanakuwa na sare za shule, na kuhakikisha wanapata chakula cha mchana ili waweze kusoma kwa bidiii.

“Kwa kweli sijaridhishwa na vitendo vya  wazazi kutochangia chakula na wanafunzi wengi wanasoma bila ya kupata chakula kama nilivyozungumza nao hivyo naagiza wazazi wote wilayani Nyasa kuhakikisha wanashirikiana kuhakikisha watoto wanapata chakula cha mchana mashuleni, kwa kuwa watoto hawa hata wakikaa majumbani mwetu si wanakula? Kwa nini wasichangie na kula mashuleni na hii ni mbinu nyingine ya kupunguza utoro na kuhamasisha wanafunzi kuja mashuleni.Watoto wakiona chakula kinatolewa shuleni watakuwa na ari ya kuja shuleni. Kwa hiyo kuanzia leo hakikisheni watoto wanakula mashuleni.” Alisema Sikitiko.

Kaimu Mkurugenzi wa Wilaya ya Nyasa ambaye pia ni Ofisa Elimu Msingi, Bw Said Kalima alisema utaratibu wa wanafunzi kula mashuleni unatekelezwa vizuri katika Tarafa ya Mpepo na kuleta changamoto katika Tarafa za Ruhekei na Ruhuhu Wilayani Nyasa. Na alimpongeza Katibu huyo kwa kuiona changamoto hiyo na kumueleza iwapo wazazi watatatua changamoto hiyo itaongeza ari ya kujifunza na kupandisha ufaulu kwa wanafunzi wa Wilaya ya Nyasa.

Ziara hii ni ya kikazi ya siku moja ambayo alikagua shule za sekondari ya Limbo, lundo na shule za msingi Likwilu na Mwongozo  pia alipata kuongea na kamati za shule hizo na kukubaliana na kamati hizo changamoto walizozikuta watazitatua haraka iwezekanavyo.

Aidha aliwapongeza wazazi hao kwa kushirikiana na Serkali kutekeleza miradi ya maendeleo katika maeneo yao hasa katika shule za mwongozo na Likwilu ambapo walikuwa wkijenga miradi ya vyoo vya wanafunzi na kuona wanafunzi wameelekezwa namna ya unawaji mikono mara wanapoingia eneo la shule.