Wananchi Chiwanda waipongeza Serikali kutatua changamoto ya Umeme

Posted on: July 22nd, 2024

Naibu Waziri wa Nishati mh.Judith Kapinga tarehe 22/07/2024 amefanya ziara ya kikazi ya siku moja Wilayani Nyasa, na kuzindua mradi wa umeme katika shule ya Sekondari ya Nyasa, pamoja na kufanya matendo ya Huruma katika Kituo Cha Afya Cha Mbamba bay wilayani hapa.

Akizungumza na wananchi wa wilaya ya Nyasa, katika Kata ya Chiwanda amesema amelazimika kufanya ziara hiyo baada ya kuona Wilaya ya Nyasa na Mbinga miradi ya umeme ya REA, haijakamilika kwa ngazi ya vijiji. Amemtaka mkandarasi wa REA kukamilisha kwa haraka miradi hiyo Ili waweze kuanzA kutekeleza miradi ya umeme kwa kupeleka Kila kitongoji.

Amewapongeza Rea kwa kuhakikisha umeme umefika katika Kata ya Chiwanda na kuwataka kuhakikisha kuwa Kila Taasisi ya Serikali,Dini inafikiwa na huduma ya umeme.

Aidha amesema kwa Wilaya ya Nyasa huduma ya umeme tayari imefika katika vijiji 84.

Ametoa wito kwa wananchi wa wilaya ya Nyasa kutumia fursa ya umeme kujiletea maendeleo kwa kuanzisha biashara mbalimbali.

Ametoa wito kwa wanafunzi kutumia fursa ya umeme kwa kusoma kwa bidii na kuongeza ufaulu.

Kwa upande wao wananchi wa wilaya ya Nyasa wameipongeza Serikali kwa kutatua changamoto ya Umeme katika Kata ya Chiwanda ambayo Iko mpakani mwa Nchi ya Tanzania na Msumbiji.

Akiongea kwa niaba ya wananchi wa kata hiyo Diwani wa viti maalumu Chiwanda mh.Catherine Mawila "mh.Naibu waziri Nishati tunaipongeza Serikali kwa kutatua changamoto ya Umeme katika Kata hii kwa kuwa mwanzo tuliona tumetengwa. Lakini kwa Sasa tunaendelea vizuri "

Akikamilisha ziara yake ya kikazi amefanya matendo ya huruma kwa kugawa Nishati mbadala jiko la gesi na vifaa mbalimbali kwa akina mama waliojifungua katika kituo Cha Afya mbamba bay.