KICHEKO CHATAWALA TAFRIJA YA KUWAAGA MADIWANI

Posted on: June 19th, 2025

Na Byarugaba Innocent, Nyasa DC

Ikiwa imesalia siku moja, kabla ya kuvunjika kikanuni kwa mabaraza ya Wahe. Madiwani nchini kama ilivyotangazwa na Waziri mwenye dhamana Mhe. Mohamed Mchengerwa Juni 20, 2025, Halmashauri ya Wilaya ya Nyasa imefanya tafrija ya kuwapongeza madiwani wake kwa kazi kubwa waliyoifanya ya kuisimamia Halmashauri ndani ya Miaka Mitano.

Mkurugenzi wa Halmashauri ya Wilaya ya Nyasa Khalid Khalif amewashukuru Wahe. Madiwani kwa uongozi wao shirikishi wa kuisimamia Halmashauri na kuiwezesha kupata mafanikio makubwa ndani ya miaka mitano ikiwa ni pamoja na kuongeza wigo wa makusanyo ya Halmashauri kutoka wastani wa bilioni 1.4 mpaka kufikia wastani wa bilioni tatu kwa mwaka huku miaka yote Halmashauri ikijinyakulia hati safi.

Makamu Mwenyekiti wa Halmashauri hiyo Mhe. Walarick Kilasi amesema kufanyika kwa hafla hiyo ni matokeo ya mafanikio yaliyofikiwa katika halmashauri ya Nyasa yanayotokana na kufanyakazi kwa kuheshimiana, kushikamana na ushirikiano baina ya Chama cha Mapinduzi, Wahe. Madiwani na Wataalam kwani mara zote wameendelea kuongea lugha moja wanapokuwa kwenye agenda za mapato na matumizi hata leo tunafanya tafrija hii yak upongezana tukiwa tunaongea lugha moja ya mapato na maendeleo kwa wananchi wetu wa Nyasa

Salum Ismail, Katibu tawala wilaya ya Nyasa aliyekuwa mgeni rasmi katika tafrija hiyo amewapongeza Wahe. Madiwani kwa kuisimamia vema halmashauri  na kuweza kufikia kiwango kizuri cha mapato yaliyowezesha kutoa huduma stahiki kwa wananchi na kwamba mafanikio yanayoonekana leo ndani ya Nyasa yanatokana na mchango mkubwa uliotokana na wahe. Madiwani hasa katika kusimamia na kuminya mianya ya upotevu wa mapato kwenye vyanzo vyake.

Aidha, Ismail amewataka wahe. Madiwani kuingia kwenye kinyang’anyiro tena wakiwa na kumbukumbu nzuri ya kuinyanyua Halmashauri yao kimapato, Kujenga miundombinu ya afya, elimu, maji, Barabara na kuiwezesha Halmashauri kutoa asilimia kumi ya mapato ya ndani ya Halmashauri yaliyowezesha vikundi vya akina mama, Vijana na wenye ulemevu kujiajiri na kuboresha maisha yao kuanzia ngazi ya kaya.

Aidha, Ismail ametoa rai kwa Wahe. Madiwani kuendelea kutoa ushirikiano kwa serikali wakati wote kwani Mkuu wa Wilaya ataendelea kuwatumia kama Madiwani Wastaafu kama nyenzo ya utatuzi wa kero kwenye Kata na kwamba heshima na michango yao bado inahitajika.

Waheshimiwa Madiwani na wataalam wamekula na kunywa katika tafrija hiyo na kucheza muziki pamoja kama ishara ya kutakiana maisha mema baada ya baraza kuvunjika rasmi kikanuni hapo Juni 20,2025