WAFANYAKAZI WA HALMASHAURI YA MJI MAKAMBAKO KUFANYA ZIARA WILAYA YA NYASA

Posted on: July 21st, 2020

Wafanyakazi wa Halmashauri ya Mji Makambako, Mkoa wa Njombe,wanatarajia kufanya Ziara ya siku moja ya  kimichezo  na Utalii Wilayani Nyasa.

Kwa mujibu wa Mkurugenzi Mtendaji wa Wilaya ya Nyasa Bw Jimson Mhagama, amesema wafanyakazi wa Halmashauri ya Mji Makambako, watafanya Ziara hiyo Julai 25 Mwaka huu, katika Halmashauri ya Wilaya Nyasa.

Bw. Mhagama amefafanua kuwa lengo la Ziara hiyo, ni kufanya Bonanza la kimichezo, na Utalii kati yao na wafanyakazi wa Halmashauri ya Nyasa,  michezo itakayofanyika katika uwanja wa michezo wa Shule ya Msingi Kilosa. Ameitaja michezo itakayochezwa ni  Mpira wa Miguu kwa wanaume,  Mpira wa Wavu( Volleyball], kuvuta Kamba, Mpira wa Netball , kukimbiza kuku kwa wanaume na wanawake, kukimbia kwenye gunia, wanawake na wanaume, na mchezo wa drafti pamoja na bao.

Alitoa wito kwa wafanyakazi wa Wilaya ya Nyasa, na Wananchi wote kujiandaa kuwapokea wageni hao kutoka makambako na kutumia Fursa za kimichezo, Utalii na Biashara kwa kujenga mahusiano na kujipatia kipato ili kukuza uchumi wa wananchi wa wilaya ya Nyasa.

Aidha Mkurugenzi Mtendaji wa Halmashauri ya Nyasa, ameipongeza Halmashauri ya Mji wa Makambako kwa kufanya Ziara katika Halmashauri ya Wilaya ya Nyasa na kutoa wito kwa Halmashauri zingine kutembelea Nyasa kwa kuwa ni Wilaya ya Kitalii na ukiwa Nyasa utaweza kuona vivutio vingi vya Utalii Vikiwemo Ziwa Nyasa,mlima Mbamba, Fukwe nzuri za Ziwa Nyasa,Jiwe la Pomonda,na Samaki wa Mapambo.

Naye Afisa michezo wa Wilaya ya Nyasa Bw Florence Msuha, amesema maandalizi ya michezo yote inaendelea vizuri , na Watumishi wanamichezo wanafanya mazoezi kwa lengo la kushindana na wageni hao.