VIJIJI 177 MKOA WA RUVUMA , KUWAKA UMEME IFIKAPO AGOSTI 31,2021

Posted on: August 21st, 2021

Kamati ya Siasa ya  Chama Cha Mapinduzi (CCM) Mkoa wa Ruvuma, leo wamekagua mradi wa wa Usambazaji wa Umeme Vijijini unaotekelezwa na Shirika la Umeme Tanzania (Tanesco) Mkoa wa Ruvuma Kupitia wakala wake (REA) na kuwasha umeme katika Kijiji cha Lulimbo, Kata ya Tingi Tarafa ya Mpepo Wilayani Nyasa.

Akikagua Mradi huo na kuwasha umeme katika majengo ya Shule ya Msingi Lulimbo, Mwenyekiti wa Chama cha Mapinduzi (CCM) Mkoa wa Ruvuma Oddo Mwisho ameridhishwa na mradi huo, na  amelitaka Shirika la Umeme Tanzania, Mkoa wa Ruvuma, kuhakikisha wanatekeleza Miradi ya Usambazaji umeme vijijini kwa haraka, na kuwaletea wananchi huduma bora za umeme, ili kutekeleza Ilani ya Chama cha Mapinduzi (CCM)  inayotaka huduma bora za Umeme kuwafikia wananchi wote hasa wa Vijijini.

Ameongeza kuwa Shirika la Umeme Tanzania Hususani Mkoa wa Ruvuma wanafanya kazi nzuri za kuhakikisha huduma ya umeme inawafikia wananchi wote hasa wa Vijijini, lakini, wanatakiwa kuongeza juhudi ili kufikia malengo waliyojiwekea. Kwa Wilaya ya Nyasa moja ya Changamoto iliyowafanya kutokufikia malengo ni ubovu wa miundombinu, ya barabara wakati wa masika, amelitaka shirika hilo kutumia muda huu wa kiangazi kutekeleza kazi za usambazaji wa Umeme.

“ndugu wananchi Tanesco ni wauza duka letu na mkandarasi ni muuza duka letu, leo tumeka kukagua duka letu ,tunajua Tanesco sio wazembe wala mkandarasi sio mzembe bali tunachokitaka mhakikishe kuwa muda huu wa kiangazi mnatekeleza majukumu yenu ya usamabazaji umeme ili kuepuka changamoto za wakati wa Mvua” alisema Mwenyekiti wa CCM mkoa wa Ruvuma

Awali akitoa taarifa ya Usambazaji wa Umeme kwa Wilaya ya Nyasa, Meneja wa TANESCO Mkoa wa Ruvuma Mhandisi Florence Mwakasege, amesema katika kutekeleza mpango wa Serikali kupeleka umeme vijijini jumla ya Vijiji 30 vya Wilaya ya Nyasa vimepatiwa Umeme na vijiji 17 Mkandarasi anaendelea na kazi ya kusambaza umeme,wakati Vijiji 37 hii leo Mkandarasi ameanza kazi ya utafiti, aidha Mkandarasi amepewa kandarasi ya kusambaza umeme katika Vijiji 177 Mkoa wa Ruvuma na ifikapo Agosti 31 mwaka huu umeme utakuwa unawaka katika Vijiji 177  na katika Wilaya ya Nyasa Vijiji 36.

Aidha ametoa wito kwa wananchi wa Wilaya ya Nyasa kuitunza miundombinu ya TANNESCO ili iendelee kuwapa huduma bora hususani kutochoma maoto katika maeneo yao.

Mradi wa Usambazaji Umeme Vijijini katika Wilaya ya Nyasa, utawasaidia wananchi kuongeza uzalishaji mali kwa kuongeza viwanda vidogo vidogo vya uzalishaji mali na kukuza uchumi kwa wananchi wa Wilaya ya Nyasa.

Imeandaliwa na Netho c Sichali

Afisa Habari Nyasa dc