UMOJA WA WATUMISHI WILAYA YA NYASA KUANZA RASMI AGOSTI,2025

Posted on: July 9th, 2025

Na Byarugaba Innocent, Nyasa DC

Umoja wa watumishi wanaofanyakazi kwenye Halmashauri ya Wilaya ya Nyasa (UWANYA) unatarajia kuanza utekelezaji wake  ifikapo mwezi Agosti, 2025 kama ilivyoridhiwa  na kikao cha pamoja kilichoketi tarehe 24 Juni, 2025 kwenye ukumbi wa Mkurugenzi  kikijumuisha uwakilishi wa wajumbe kutoka kwenye divisheni na vitengo

Mwenyekiti wa Umoja huo Limbega Hassan Ally ameeleza kuwa lengo la UWANYA  ni kuimarisha ushirikiano na kusaidiana wakati wa shida kazini kama sehemu ya kudumisha umoja, udugu, upendo na mshikamano mahala pa kazi kwani sote  ni waajiriwa wa Mkurugenzi wa Halmashauri ya Nyasa.

Aidha, Limbega amewaomba watumishi  wote kutambua umuhimu wa uanzishwaji   wa umoja huo na kujiunga kwa wingi ili kufikia adhima yake kwa maslahi mapana ya watumishi wenyewe huku wakitambua kuwa  shida hazina mwenyewe  na hazipigi hodi hivyo kuanzishwa kwa mfuko huo  ni ukombozi katika kufikia  utumishi wenye tija na haiba.

“…UWANYA haitajihusisha na mrengo wowote wa kisiasa,kidini,ukabila ama ukanda. Kimsingi ni kama daraja la kutuunganisha watumishi kama familia moja. Niwaombe watumishi tujivunie na kutembea kifua mbele kama sehemu ya wajumbe waanzilishi”.. amesema Limbega

Akizungumzia utaratibu wa kujiunga Mkuu wa divesheni ya rasilimali watu na utawala Khamis Mkelle amesema kila mtumishi kwa hiari yake atajaza fomu maalum ya kujiunga  na kuridhia makato ya shilingi 5,000.00 kukatwa kwenye mshahara wake kila mwezi kwa ajili ya UWANYA.

Kaimu Mkurugenzi mtendaji wa Halmashauri ya Wilaya ya Nyasa Pasifiki Mhapa ametoa wito kwa watumishi kujiunga kwani taratibu zote za uanzishwaji zimefuatwa na kukamilika  ikiwemo kupta uongozi kamili na kukamilishwa kwa uandaaji wa katiba inayoonesha kuwa  Mkurugenzi Mtendaji kwa kikatiba ndiye mlezi wake.