Timu ya Halmashauri ya Nyasa yakabidhiwa zawadi za ubingwa Nyasa

Posted on: August 23rd, 2021

Chama cha Mpira wa Miguu wilaya ya Nyasa ( FANYA), leo kimekabidhi zawadi ya Mshindi  wa Ligi soka daraja la Nne ambaye ni Timu ya Soka ya Halmashauri ya Wilaya ya Nyasa.

Akikabidhi Zawadi hizo Mwenyekiti wa Chama cha soka wilayani hapa bw.Robert Songambele ameipongeza Timu ya Halmashauri ya Wilaya ya Nyasa, kwa kufanikiwa kutwaa ubingwa wa Ligi daraja la nne wilayani hapa, licha ya Ushindani mkubwa uliojitokeza wakati wa mashindano hiyo.

Ameongeza kuwa Timu ya Halmashauri ya Wilaya ya Nyasa ilijiandaa vizuri na kuleta ushindani katika soka na kufanikiwa kuwa Bingwa wa  Ligi soka daraja la nne wilayani Nyasa na kusema kuwa kama chama cha Mpira wa miguu wanaimani kubwa na Timu ya Halmashauri, ambayo inatarajia kushiriki ligi soka Daraja la 3 Mkoa wa Ruvuma hivyo wamemwomba Mkurugenzi Mtendaji Wilaya ya Nyasa, kujiandaa vema kwa kuwa ni Timu pekee ya Serikali inayoshiriki mashindano haya Ngazi ya Mkoa hivyo ni Timu inayoweza kuhamasisha Vivutio vya Utalii Wilayani Nyasa.

“Naipongeza sana Timu ya Nyasadc kwa kushindana na kutwaa Ubingwa wa Wilaya ya Nyasa hivyo nawatakia maandalizi mema ya kushindana ligi ya Daraja la Tatu, Mkoa wa Ruvuma kwa kuwa ni Timu pekee ya Serikali  inayoshiriki mashindano haya na inatoa changamoto kwa wilaya zingine”

Zawadi alizokabidhi ni Kombe na Mpira mmoja,aidha ametoa rai kwa wadau wa Mpira wa miguu kudhamini mashindano mbalimbali ya mpira wa miguu Wilaya ya Nyasa.

Akipokea zawadi hizo kwa niaba ya Timu ya Halmashauri ya Nyasa, Mkurugenzi Mtendaji Wilaya ya Nyasa Ndugu Jimson Mhagama amesema anawapongeza wachezaji na Watumishi wote wa Halmashauri ya Wilaya ya Nyasa kwa Ushirikiano wao katika michezo yote ya Ligi hiyo,aidha amesema Ofisi yake inajali michezo, na inahamasisha watumishi kufanya mazoezi.

Ligi hiyo ilishirikisha timu za Mbamba bay City, Young Star ya Mbamba bay,Likwilu na Nyasadc Fc na imeshinda kwa kupata pointi 7.