Shirika la wasaidizi hakika za kisheria hakiza Binadamu latambulisha mradi Nyasa

Posted on: August 13th, 2024

Shirika la Wasaidizi wa Sheria na Haki za Binadamu Wilaya Ya Nyasa (WASHEHABINYA)  tarehe 13-08-2024 Wametambulisha Mradi mpya wenye  Thamani ya Milioni 5 mradi uliotambulishwa katika Ukumbi wa Ofisi ya Mkurugenzi Mtendaji Wilaya ya Nyasa.

Lengo la mradi huu ni kusaidia  utoaji elimu ya kisheria na haki za Binadamu, ufuatiliaji wa matukio ya ukiukwaji wa haki za binadamu pamoja na Msaada wa kisheria kwa wananchi katika Wilaya ya Nyasa.

Mradi huu utatekelezwa kwa muda wa Miezi mitatu katika Kata tatu za Liuli, Kihagara, Lipingo na Mbambabay, kuanzia  July hadi October 2024. Mradi huu umefadhiliwa na shirika lisilo la kiserikali la WOMAN FUND TANZANIA TRUST  ambalo makao yake yapo jiji la Dar es Salaam.

Akizungumza wakati anatambulisha mradi, Afisa ufuatiliaji na tathimini Bw.Nassoro Nurdin amesema mradi utawajengea uwezo wa Kisheria Wanawake na Watoto ambapo kundi hili kwa kiasi kikubwa, limeachwa nyuma katika utetezi wa maslahi yao ikiwepo upatikanaji wa haki ya umiliki wa ardhi na Watoto kufanyiwa ukatili wa kijinsia  bila jamii kuibuka na kuripoti matukio hayo.

 Ameongeza kuwa WASHEHABINYA na wadau mbalimbali wenye lengo la kusimamia haki mbalimbali za hao waathirika, wataendesha semina na makongamano kwa wanawake, katika  VICOBA,  viongozi wa serikali za vijiji na kata, juu ya sheria  ya ardhi na usawa wa kumiliki mali.

Wadau mbalimbali walitoa maoni yao na kulipongeza  shirika hili kwa namna linavyofanya kazi na kusaidia jamii juu ya ukatili wa kijinsia na utoaji wa msaada kisheria na kupambana na vitendo viovu kama rushwa ya ngono.

Mkurugenzi Mtendaji Wilaya ya Nyasa aliyewakilishwa na ,Afisa Maendeleo Wilaya ya Nyasa Ndugu Shanel Mbunda, aliwataka wanachi na Wadau mbalimbali kutoa ushirikiano ili kuhakikisha jamii inaishi kwa usawa na haki katika wilaya yetu na nchi kwa ujumla.

Aidha, ametoa pongezi nyingi kwa shirika hili kwa Jinsi linavyofanya kazi na kutoa ushirikiano kwa serikali kila mara pale ambapo panahitajika. Aidha, ameahidi kutoa ushirikiano kwa makundi yote ya watu katika jamii ili kuhakikisha haki na usawa unafuatwa katika jamii yetu.