Serikali yatoa milioni 851 Ujenzi wa kituo cha Afya Mbaha

Posted on: October 22nd, 2024

Mkurugenzi Mtendaji wa Halmashauri ya Wilaya ya Nyasa Bw. Khalid Khalif Tarehe 22/10/2024 amewaongoza wananchi wa Kata ya Mbaha, kufanya usafi katika eneo ambalo litajengwa Kituo cha Afya kitakahohudumia kata hiyo na maeneo Jirani.

Serikali imetoa shilingi milioni 851 kwa ajili ya ujenzi wa Kituo cha afya, katika Kta Hiyo ili kutatua changamoto ya wananchi waliokuwa wanatembea umbali mrefu kutafuta huduma za Afya.

Akizungumza na wananchi wakati akikamilisha zoezi hili amewataka wananchi kumshukuru Rais wa Tanzania Dkt Samia Suluhu Hassan kwa kutoa fedha  kwa ajili ya ujezi wa kituo cha afya cha kisasa ambacho kinakwenda kutatua changamoto za Afya kwa wakazi wa kata ya Mbaha na maeneo Jirani.

Bw Khalif amefafanua kuwa lengo la Serikali ni kutoa huduma bora kwa wananchi, hivyo basi baada ya kuona wananchi wa mbaha wanateseka Serikali imeona ni vizuri ikapatiwa huduma bora za afya kwa kuwajengea Kituo cha Afya.

Amewataka wananchi hao kushiriki kikamilifu kwa kusimamia ujenzi na kufanya kazi mbalimbali ili kujimilikisha kituo hicho. Aidha amemshukuru na Kumpongeza Rais wa Tanzania kwa kutoa Fedha hizo na Katibu Mkuu wa CCM Dkt Emanuely Nchimbi kwa kwenda kuomba fedha hizo ikiwa ni utekelezaji wa Ahadi liyoitoa alipofanya Ziara ya kikazi Wilayani Nyasa.

Kwa Upande wa wananchi wa Kata ya Mbaha wameishukuru Serikali kwa kutoa Fedha hizo kwa ajili ya ujezi wa Kituo cha Afya na kusema kuwa walikuwa wakiteseka kutembea umbali wa Kilomita zaidi ya 59 kufuata huduma za matibabu Wilaya ya Mbinga. Aidha wamesema wamehamasika na watafanya kazi usiku na mchana kwa ajili ya kutekeleza Mradi huu

Diwani wa Kata ya Mbaha Stewart Nombo ambaye pia ni mwenyekiti wa Halmashauri ya Wilaya ya Nyasa mesema atasimamia vizuri ujenzi wa Kituo hicho cha afya na kamwe hatamvumilia mwananchi atakayetaka kuhujumu mradi.

Amewahamasisha wananchi kufanya kazi mbalimbali watakapokuwa wakitangaziwa kwa kuwa kituo hiki ni chetu na ili tukimiliki tunatakiwa kushiriki kazi mbalimbali