SERIKALI yatatua changamoto ya barabara na umeme Kijiji cha Ndonga,Wilayani Nyasa

Posted on: October 21st, 2022

Mkuu wa Mkoa wa Ruvuma Kanali Laban Thomas,  Tarehe 21/10/2022 amefanya ziara ya kikazi ya Siku moja Wilayani Nyasa.Akiwa Wilayani hapa ametembelea na kukagua Mradi wa Barabara ya Njambe hadi Ndonga.

Akikagua Mradi huo amempongeza Rais wa Jamhuri ya Muungano wa Tanzania Samia Suluhu Hassan kwa kuleta fedha Tsh milioni 220 za Tozo kwa ajili ya kutekeleza mradi wa barabara hiyo, ambayo wananchi wa Kijiji cha Ndonga hawakuwahi kuwa na barabara tangu Uhuru na walikuwa wakilazimika kusafiri kwa njia ya mtumbwi au boti.

Ameongeza kuwa barabara hiyo ni ukombozi mkubwa kwa wananchi wa kijiji cha Ndonga kata ya Liwundi Wilayani Nyasa na kumuagiza meneja wa TARURA Mhandisi Thomas Kitusi akamilishe kwa wakati ili iweze kupitika majira yote ya mwaka.

Awali akitoa taarifa ya Mradi,meneja wa Wakala wa Barabara za Vijijini na Mijini (TARURA) Mhandisi Thomas Kitusi amesema,mradi umegharimu tsh Miliono 220 na fedha zilizotumika ni kutoka mfuko wa barabara na Tozo na kazi zilizofanyika ni kuchonga barabara na kutengeneza karavati 16.

Aidha amesema Bajeti ya fedha za barabara imeongezeka hadi kutoka bilioni 2.4 hadi kufikia Bilioni 3.4 na nyongeza hii itatengeneza barabara ya Luhindo Darpori Mpakani mwa Tanzania na Msumbiji.

Kwa upande wao wananchi wa kijiji cha Ndonga wameishukuru Serikali kwa kutatua changamoto ya Umeme na Barabara kwa kuwa mwanzo walijiona wametengwa kwa kuwa hawakuwa na Miundombinu ya barabara na umeme hali iliyowalazimu kubeba kichwani Mitihani ya darasa la saba na darasa la nne,

Naye Mwenyekiti wa Chama Cha Mapinduzi CCM Mkoa wa Ruvuma Oddo Mwisho amewataka wananchi kuitunza miundombinu hii, na kuomba Serikali iendelee kuwapa miradi mbalimbali ikiwa na pamoja na ukamilishaji wa zahanati ya Ndonga iliyojengwa kwa nguvu za Mbunge wa Jimbo la Nyasa Mhandisi Stella Manyanya