Serikali kujenga Miradi 3 ya TSH Bilion 6.4 Nyasa

Posted on: December 3rd, 2024

Mhe. Peres Magiri na Mhe Stella Manyanya Washuhudia Utiaji Saini Mikakati ya Miradi ya Maji Wilaya ya Nyasa

Mkuu wa Wilaya ya Nyasa, Mheshimiwa Peres Magili, pamoja na Mbunge wa Jimbo la Nyasa, Mheshimiwa Stella Manyanya, washuhudia zoezi la utiaji saini mikataba ya miradi mikubwa ya maji inayotekelezwa katika wilaya hiyo. Miradi hii inatarajiwa kufanywa na Wakala wa Maji na Usafi wa Mazingira Vijijini (RUWASA), ikiwa ni sehemu ya juhudi za Serikali kuboresha huduma za maji vijijini.

Mikataba hiyo imesainiwa na Kaimu Meneja wa RUWASA Mkoa wa Ruvuma, Mhandisi Bartholomew Matwiga, na wakandarasi wa miradi mbalimbali ya maji katika wilaya ya Nyasa. Wakandarasi waliosaini mikataba ni: Rj Mussa Construction, kwa mradi wa Maji wa Nangombo-Kilosa; Consel Construction Ltd, kwa mradi wa Maji wa Mbanga; na Namis Corporate Construction kwa mradi wa Maji wa Ndengele.

Akizungumza katika hafla hiyo, Mheshimiwa Magiri aliwaasa wakandarasi kuhakikisha wanakamilisha miradi hiyo kwa wakati na kulingana na masharti ya mikataba. Alisisitiza kuwa, jamii ya wilaya ya Nyasa inahitaji huduma ya maji kwa haraka, na Serikali ina dhamira ya kufikia lengo la kutoa huduma ya maji kwa asilimia 85 ya wananchi vijijini.

Meneja wa RUWASA Wilaya ya Nyasa, Mhandisi Masoud Samila, alieleza takwimu za wananchi watakaonufaika na miradi hiyo, pamoja na gharama za jumla za miradi. Alisema mradi wa Maji Nangombo-Kilosa, wenye gharama ya shilingi bilioni 3.7, utawanufaisha wananchi wapatao 13,500 kutoka vijiji vya Nangombo, Kilosa, Luhekei, na Likwilu.

Mradi wa Maji wa Ndengele/Mbuyula, wenye gharama ya shilingi bilioni 1.8, utawanufaisha wananchi 10,072 wa vijiji vya Ndengele na Mbuyula.

 Mradi wa Maji wa Mbanga, wenye gharama ya shilingi milioni 900,000, utawanufaisha wananchi 4,900 wa vijiji vya Mbanga na Kigongo.

Baada ya kusainiwa kwa mikataba hiyo mitatu, yenye gharama jumla ya shilingi bilioni 6.4, Mheshimiwa Mbunge wa Nyasa, Eng. Stella Manyanya, alimpongeza Rais wa Jamhuri ya Muungano wa Tanzania, Dkt. Samia Suluhu Hassan, kwa dhamira yake ya dhati ya kumtua Mama Ndoo kichwani. Alisema kuwa, kwa mara Kwa mara wilaya ya Nyasa imepokea fedha za ujenzi wa miradi ya maji zikiwa mabilioni kwa bilioni.

Aidha, Mheshimiwa Manyanya alishukuru Wizara ya Maji, chini ya uongozi wa Mheshimiwa Jumaa H. Aweso, Naibu Waziri Mheshimiwa Eng. Kundo A. Mathew, pamoja na Katibu Mkuu, Eng. Mwajuma Waziri, kwa usimamizi na ufuatiliaji mzuri wa miradi ya maji. Mbunge huyo pia alishukuru RUWASA Makao Makuu, Mkoa na Wilaya kwa kusimamia miradi hiyo kwa ufanisi na viwango vya juu kama ilivyobainishwa kwenye mikataba.

Mheshimiwa Manyanya alisisitiza umuhimu wa ushirikiano wa pamoja kati ya Serikali, wakandarasi, na wananchi ili kuhakikisha miradi hii inatekelezwa kwa ufanisi, na kwamba huduma ya maji inapatikana kwa wananchi wa Nyasa kwa haraka na kwa ubora wa hali ya juu.