Rc RUVUMA AIPONGEZA NYASA DC kupata Hati safi

Posted on: July 14th, 2024

Na Netho sichali,Nyasa.

Halmashauri ya Wilaya ya Nyasa imepongezwa kwa  kupata  hati safi katika matokeo ya ukaguzi ambao ulifanywa na Mdhibiti na Mkaguzi Mkuu, wa Hesabu za Serikali kwenye  hesabu  za Halmashauri  ya Wilaya ya Nyasa kwa mwaka wa fedha 2022/2023  ulioishia  Juni 30, 2023.

Pongezi hizo zimetolewa  Julai 14, 2024 na Katibu Tawala wa Mkoa wa Ruvuma Rehema Madenge, wakati akisoma hotuba kwa niaba ya Mkuu wa Mkoa wa Ruvuma  Kanali Abbas Mohamed Abbas katika Baraza la madiwani la kujadili taarifa ya Mkaguzi na Mdhibiti Mkuu wa Hesabu za Serikali (CAG) mwaka wa fedha wa 2022/2023 katika Halmashauri  ya Wilaya ya  Nyasa lilofanyika katika Ukumbi wa Ofisi ya Mkurugenzi Mtendaji.

Amesema “Niipongeze sana Halmashauri ya Wilaya ya Nyasa kwa kupata hati safi ikiwa ni matokeo ya  ukaguzi ambao ulifanywa na  Mdhibiti na Mkaguzi Mkuu wa Hesabu za Serikali hongereni sana”

Pamoja na pongezi hizo  ameuagiza uongozi wa  Halmashauri ya Wilaya ya Nyasa kuhakikisha unakamilisha  mapendekezo ya CAG  na kufunga hoja zote zilizobaki  ikiwa ni pamoja na maagizo ya LAAC  kabla au ifikapo  Septemba 30,2024.

Aidha ametoa wito kwa madiwani wa Halmashauri ya Wilaya ya Nyasa kufanya ufuatiliaji wa karibu na kuhakikisha hoja  hazizalishwi na kuweka mikakati ya kupunguza hoja.

Kwa upande wake Mwenyekiti wa Halmashauri ya Wilaya ya Nyasa  Mhe.  Stewart Nombo amesema kuwa utekelezaji wa  maagizo yote yaliyotolewa utaanza mara moja  na taarifa ya utekelezaji itawasilishwa ofisi ya Mkuu wa Mkoa wa Ruvuma kwa muda uliopangwa.

Aidha amempongeza Mkurugenzi Mtendaji wa Halmashauri ya Wilaya ya Nyasa Bw.Khalid Khalif kwa kusimamia na kukusanya mapato kwa asilimia 103 ana kupandisha bajeti ya makusanyo ya ndani kutoka Bilioni 1.4 Hadi kuifikia Bilioni 1.7.

Mbunge wa Jimbo la Nyasa mhandisi Stella Manyanya ameipongeza Halmashauri ya Wilaya ya Nyasa kwa kupata hati safi na Kusema kuwa waendelee kushirikiana kwa matokeo ya Hati safi ni ushirikiano wa Viongozi, wataalam na wananchi