OFISI ya Rais Utumishi wa Umma yatoa mafunzo ya Usimamizi wa utendaji kazi kwa watumishi

Posted on: May 20th, 2024

Ofisi ya Rais menejimenti ya Utumishi wa Umma na Utawala bora (ORMUUB) tarehe 20/05/2024, imetoa mafunzo ya Mfumo wa Usimamizi wa Utendaji Kazi katika Utumishi wa Umma PEPMIS na PIPMIS kwa watumishi wa Umma wa Halmashauri na Taasisi za Serikali ya Wilaya ya Nyasa

Mafunzo haya yamefanyika katika Ukumbi wa Ofisi ya Mkurugenzi Mtendaji wilayani hapa, na lengo la mafunzo haya ni kuwajengea uwezo watumishi wa Umma ili waweze kutoa Taarifa ya utekelezaji na kupimwa, wa majukumu yao kupitia mfumo wa usimamizi wa utendaji kazi wa Utumishi wa Umma

Akifungua mafunzo hayo Mkurugenzi wa Idara na Sera na Mipango (ORMUUB) Bw Cyrus Kapinga amesema mafunzo haya ni muhimu sana kwa watumishi wa Umma kwa kuwa watakuwa wanatoa taarifa ya utendaji kazi na kupimwa kwa njia ya mfumo, kufanya shughuli mbalimbali kwa njia ya mfumo na mtumishi akiwa katika kituo chake cha kazi, kama kuomba mikopo, uhamisho na shughuli nyingine nyingi.

Ameongeza kuwa ameamua na timu yake kuja mikoani kwa ajili ya kufundisha na kufanya tathimini ya mfumo huu ili waweze kutatua changamoto zinazowakabili watumishi pindi wanapotumia mifumo huu kwa kuwa nchi yetu inachangamoto hususani ya intanet.

Ametoa wito kwa Watumishi kujifunza na kutumia mfumo huu kwa kuwa mfumo wa awali wa Opras umefutwa, hivyo tunakila sababu ya kuingia katika mfumo na kuingiza majukumu ya kila siku na kutoa taarifa ya kazi ambazo umetekeleza na mfumo utakuwa unafanya Tathimini ya wafanyakazi wa umma.

Awali akimkaribisha Mgeni rasmi kufungua mafunzo Katibu Tawala wa Wilaya ya Nyasa Bw, Salum Ismail amewataka watumishi kufanya kazi kwa juhudi na kutoa taarifa ya utendaji kazi kupitia mfumo huu.

Watumishi waliopata mafunzo ni Wakuu wa Divisheni na Vitengo na watumishi wote wa Halmashauri ya Wilaya ya Nyasa pamoja na Taasisi zake.