NYASA YATOA MAFUNZO KWA WAANDISHI WASAIDIZI,BVR KIT OPERATORS

Posted on: April 30th, 2020

Halmashauri ya Wilaya ya Nyasa,  leo imetoa mafunzo kwa Maafisa waandikishaji wasaidizi,bvr operators ngazi ya kituo na waandishi wasaidizi ngazi ya kata  kwa ajili ya Zoezi la Uboreshaji wa Daftari la kudumu la wapiga kura awamu ya pili, litakaloenda sambamba na Uwekaji wazi wa Daftari la kudumu la wapiga kura awamu ya kwanza.

Zoezi la uboreshaji wa Daftari la kudumu la Wapigakura  awamu ya pili, linatarajia kuanza  mei  02-04 mwaka huu na litadumu kwa siku tatu Wilayani hapa na kufanyika kila makao makuu ya  Kata. Mafunzo hayo yamefanyika katika ukumbi wa Shule ya Sekondari Limbo Kata ya Kilosa wilayani hapa.

Akifungua Mafunzo hayo ya Siku moja Afisa Mwandikishaji wa Wilaya ya Nyasa Bw. Jimson Mhagama amewataka  Maafisa waandikishaji wasaidizi,bvr operators ngazi ya kituo na waandishi wasaidizi ngazi ya kata kuhakikisha wanaelewa mafunzo,kwa kuwa watayatumia katika kufanikisha zoezi hili.

Bw. Mhagama amezitaja shughuli ambazo zinatajia kufanyika katika zoezi la uandikishaji ni wananchi kujiandikisha katika Daftari la kudumu la wapiga kura ambao walikosa fursa ya kujiandikisha katika zoezi lililopita, kuhamisha taarifa la za wapiga kura waliohamia Wilaya ya Nyasa na wanaotegemea kuwepo hadi mwezi Oktoba mwaka huu.

Aliongeza kuwa kazi nyingine, zitakazofanyika ni kuwaondoa wapiga kura waliokosa sifa za kuwepo katika Daftari la wapiga kura,mfano aliyehama,aliyefariki,na aliyefungwa.

Aidha alitoa wito kwa wananchi wa Wilaya ya Nyasa kujitokeza kwa wingi kujihakiki kwa waliojiandikisha awamu ya kwanza na kuwataka wale ambao hawakujiandikisha wajitokeze kwa wingi katika zoezi hili kwa kuwa ni zoezi la awamu ya mwisho kujiandikisha.

Katika hatua nyingine alitoa wito kwa washiriki hao kuhakikisha kuwa wanajilinda na kuwalinda wananchi kwa kuzingatia tahadhari ya ugonjwa wa Corona,ikiwa ni pamoja na kuhakikisha kila mtu anayefika kituoni anawa maji yanayotiririka kwa kuwa vifaa vyote wmekabidhiwa washiriki hao.