NYASA YAPATA HATI SAFI MIAKA MITANO MFULULIZO, DED APEWA KONGOLE KWA UBUNIFU NA USIMAMIZI MAPATO

Posted on: June 19th, 2025

 Na Byarugaba Innocent, Nyasa DC

Mkaguzi Mkazi wa Mkoa wa Ruvuma Nicholaus Killinga ameipongeza Halmashauri ya Wilaya ya Nyasa kwa kuendelea kupata hati safi baada ya kupitia taarifa ya ukaguzi wa hesabu za Mwaka 2023/2024.

Killinga amesema hayo wakati wa baraza maalum la mkaguzi na mdhibiti mkuu wa hesabu za serikali (CAG) lililoketi kwenye ukumbi wa mikutano wa Halmashauri Jumatano tarehe 18 Juni, 2025

Mwenyekiti wa Halmashauri hiyo Mhe. Stewart Nombo amesema mafanikio yaliyofikiwa katika halmashauri ya Nyasa yanatokana na kufanyakazi kwa mshikamano na ushirikiano baina ya Chama cha Mapinduzi, Wahe. Madiwani na Wataalam kwani mara zote wameendelea kuongea lugha moja wanapokuwa kwenye agenda za mapato na matumizi.

“Ndugu Katibu tawala,wakati tunaingia madarakani mwaka 2020 tulikuta Halmashauri imepata hati yenye mashaka na wakati huo mapato yalikuwa bilioni 1.4, mwaka 2025 tunakwenda kuhitimisha kipindi chetu cha miaka 5 tukiwa na hati safi miaka yote na mapato yakipanda kufikia bilioni 3 hili ni jambo la kujivunia” amesema Nombo

Akitoa salamu kwa niaba ya Mkuu wa Wilaya, Katibu tawala wilaya ya Nyasa Salum Ismail amewapongeza Wahe.Madiwani na wataalam  kwa kazi nzuri iliyowezesha kupata hati safi na kupanua wigo wa mapato yanayokwenda kuwahudumia wananchi na kwamba kitendo hicho kinasadifu namna walivyoishi kwa kushirikiana na kuheshimia katika kuijenga Nyasa.

Kwa upande wake katibu tawala wa Mkoa wa Ruvuma Mary Gasper Makondo aliyefika kwa niaba ya Mkuu Mkoa amewapongeza Wahe. Madiwani kwa kuisimamia vema Halmashauri, Mkurugenzi wa wataalam wake kwa kuendelea kufanyakazi kwa ushirikiano, weledi na ubunifu na kufanikisha kupata hati safi na kwamba hayo ndio malengo ya serikali ya awamu ya sita inayoongozwa na Mhe. Dkt. Samia Suluhu Hassan.

Mkurugenzi mtendaji wa Halmashauriya Nyasa Khalid A. Khalif amepokea pongezi kwa niaba ya wataalam na kuwashukuru Wahe.Madiwani kwa ushirikiano walioonyesha katika kipindi chao cha uongozi na kwamba maelekezo yote yaliyotolewa na CAG yanakwenda kufanyiwa kazi kikamilifu tena kwa wakati.

Aidha, Khalid ameeleza kuwa ili kufikia malengo chanya ya ukaguzi wa hesabu za serikali, Halmashauri itaendelea kufanyakazi kwa kuzingatia Sheria, kanuni, taratibu na miongozo iliyopo.