Nyasa DC yakabidhi pikipiki kwa watendaji kata, DED awataka kutoa Huduma bora kwa Wananchi

Posted on: August 16th, 2024

Halmashauri ya Wilaya ya Nyasa tarehe 16/08/2024 imekabidhi Pikipiki kwa Watendaji wa Kata 3 Mpepo, Mbamba bay na Liwundi ili kuongeza uwajibikaji kwa wananchi, makabidhiano yaliyofanyika katika Ofisi ya Mkurugenzi Mtendaji wa Halmashauri ya Nyasa.

Mkurugenzi Mtendaji wa Halmashauri ya Wilaya ya Nyasa Bw. Khalid Khalif amewakabidhi watendaji hao na kuwataka wafanye kazi kwa juhudi na kuongeza uwajibikaji kwa wananchi, kwa kutatua kero mbalimbali za wananchi.

Amefafanua kuwa Pikipiki hizo zimetoka Ofisi ya Rais Tawala za Mikoa na Serikali za Mitaa na zimeletwa kwa ajili ya watendaji hao ili waweze kutekeleza majukumu yao ipasavyo na kutumia kwa manufa ya wananchi wa kata husika.

Bw.Khalif, ametoa wito kwa watendaji hao kuhakikisha wanazitunza na kutumia kwa ajili ya kutoa huduma bora kwa wananchi na sio vinginevyo.

Amemshukuru Mhe. Dkt Rais Samia Suluhu Hassan kwa kuimarisha mazingira ya watumishi kutoa huduma bora kwa kutoa usafiri wa Pikipiki hizo. Pia amemshuku Mbunge wa Jimbo la Nyasa Mhandisi Stella Manyanya kwa kuisemea vizuri Jimbo la Nyasa na hatimaye wananchi wapate huduma bora.

Kwa upande wao watendaji wa kata waliokabidhiwa Pikipiki wamesema watatumia pikipiki kwa ajili ya kuboresha kazi, Hiram Malugu ni Mtendaji Kata ya Mbamba bay ” Nilikuwa natumia pesa ya mfukoni kwa ajili ya kwenda kutatua changamoto za wananchi lakini kwa sasa nitaongeza juhudi”

Afisa Mtendaji wa Kata ya Mpepo amesema atatumia Pikipiki kuimarisha Ulinzi na Usalama wa mpaka wa kimataifa wa Msumbiji na Tanzania kwa kuhakikisha wageni wanaoingia na kutoka katika Nchi ya Tanzania na Msumbiji wanakuwa salama.

Naye Afisa Mtendaji wa Kata ya Liwundi Mchopa amesema atatumia pikipiki kuhakikisha Utawala bora unaimarika. Mikutano ya kila robo inafanyika pamoja na kusoma mapato na matumizi kwa kuwa awali alikuwa akilazimika kutembea umbali mrefu lakini kwa sasa hana tazizo.