NAIBU WAZIRI MALIASILI NA UTALII AIPONGEZA WILAYA YA NYASA KUHIFADHI MAZINGIRA.

Posted on: July 29th, 2018

Naibu Waziri wa Maliasili na Utalii Mh Japhet Hasunga ameipongeza Wilaya ya Nyasa kwa kuweka mikakati ya kuhifadhi mazingira na kutekeleza kwa kupanda miti ya kibiashara.

Aliitoa kauli hiyo wakati akikagua mradi wa panda miti kibiashara eneo la kijiji cha Mpepo Kata ya Mpepo Wilayani Nyasa jana Wakati akiwa kwenye ziara ya kikazi ya siku moja Wilayani hapa.

Mh.Hasunga amefafanua kuwa amefurahishwa sana na mradi huo wa panda miti ya kibiashara unaotekelezwa maeneo mbalimbali ya Halmashauri ya Nyasa hususan katika milima ya Mpepo ambayo yatasaidia kuweka mazingira katika hali ya uhifadhi,”Kukiwa na miti maeneo kama haya yatasaidia kukuza uchumi wetu kwa kipato cha mtu mmoja mmoja na Serikali kwa ujumla, kwa kuwa maeneo haya bila kupanda miti yasingefanyiwa kitu chochote”.

Aliongeza kuwa wananchi wamehamasika kupanda miti hiyo hivyo wasibughudhiwe wala kusiwe na migogoro yoyote na amewataka TFS kuisaidia jamii na kuwa nayo karibu kwa kuchangia vitendea kazi katika shule miundombinu ya barabara nk.

Katika hatua nyingine amewataka wananchi wa Kitongoji cha Jangwani  kijiji cha ndondo katika kata ya Liparamba kuacha kulima na kuheshimu mipaka ya hifadhi ya Liparamba ili kila ardhi itumike kwa mujibu wa matumizi ya ardhi husika ”ardhi hii imetengwa kwa ajili ya pori la akiba,na wanyama pori ndio wanaostahili kuishi maeneo haya hivyo wananchi heshimuni mipaka ya hifadhi ya wanyamapori ya Liparamba”

Naibu Waziri wa maliasili na utalii amefanya ziara ya siku moja (28.07.2018) Wilayani hapa na akiwa katika Ziara hiyo alikagua na kupokea taarifa ya shamba la miti katika kijiji cha Mpepo kata ya Mpepo na akafanya mkutano wenye lengo la kutatua kero za wananchi katika Kitongoji cha Jangwani Kijiji cha Ndondo na kata ya Liparamba Wilayani Nyasa MKoani Ruvuma.