MSIMAMIZI WA Uchaguzi Nyasa atoa maelekezo kwa wadau wa Uchaguzi.

Posted on: September 26th, 2024

Msimamizi wa Uchaguzi wa Jimbo la Nyasa Bw. Khalid Khalif, tarehe 26.09.2024 ametoa maelekezo ya uchaguzi wa Serikali za Mitaa kwa wadau.

Maelekezo hayo ameyatoa katika Ukumbi wa Mkurugenzi  Mtendaji Wilaya ya Nyasa na Kuhudhuriwa na wadau wa Uchaguzi, Viongozi wa Dini, Vyama vya Siasa,wawakilishi wa mashirika yasiyo ya kiserikali na kamati ya usalama Wilaya.

Bw. Khalif amefafanua   kanuni namba 9 ya kanuni za  Uchaguzi wa Mwenyekiti wa Kijijij, Wajumbe wa Halmashauri ya Kijiji na Mwenyekiti wa Kitongoji katika Mamlaka za Wilaya za Mwaka 2024 imempa Mamlaka ya kutoa maelekezo ya Uchaguzi kwa wadau mbalimbali siku 62 kabla ya Uchaguzi.

Ameitaja Tarehe ya Kufanyika kwa Uchaguzi huo ni 27.11.2024, na katika Halmashauri ya Wilaya ya Nyasa Vijiji 84 na Vitongoji 421 vitashiriki Uchaguzi wa Wenyeviti wa Vijiji, wenyeviti wa Vitongoji, wajumbe wa Halmashauri za Vijiji mchanganyiko  na Wajumbe wa Halmashauri kundi la Wanawake..

Amewataka wadau hao kutoa Taarifa za Uchaguzi kwa jamii nzima za wananchi wa Wilaya ya Nyasa, ili waweze kushiriki kikamilifu zoezi la kujiandikisha, kugombea na kupiga kura ili tuweze kuwapata viongozi bora watakaosimamia na kutuongoza katika maeneo yetu.

Ameongeza kuwa Uandikishaji Utafanyika kwa siku 7 kuanzia Tarehe 11-20 Octoba 2024 kwenye majengo ya Umma katika eneo la kitongoji, pale ambapo hakuna jengo la Umma Uanndikishaji utafanyika sehemu ambayo Msimamizi Msaidizi wa Uchaguzi atakuwa amekubaliana na Viongozi wa Vyama vya Siasa.

Kwa upande wake Mkuu wa Wilaya ya Nyasa Mhe. Peres Magiri, amewataka wadau hao kutoa hamasa kwa wanajamii na kuhakikisha wananchi wanachagua viongozi Bora ambao watawasaidia kuwaletea maendeleo.

Aidha amerwataka kuhakikisha wanachagua kiongozi ambaye ana kazi zake binafsi za kujiletea maendeleo ili aweze kuiongoza vema jamii.

Amesema ataendelea kuhamasisha wananchi kujitokeza kwa wingi kushiriki, kujiandikisha na kupiga kura kuchagua Viongozi bora.

Kwa upande wa wadau, wamesema watatoa ushirikiano na kuhamasisha wanajamii ili waweze kushiriki kikamilifu uchaguzi wa Serikali za Mitaa 2024.