MOSHI MWEUPE MATOKEO YA KIDATO CHA SITA,NYASA DC

Posted on: July 9th, 2025

-Wanafunzi 273 wafaulu kwa 100% 

-Uwekezaji wa Dkt. Samia walipa kwa kishindo

Na Byarugaba Innocent, Nyasa DC

Jumla ya Wanafunzi 273 kutoka shule za Mbamba-Bay na St. Paul’s Sekondari walioketi Mwezi Mei, 2025 kufanya Mtihani wa Kidato cha Sita wamefaulu wote kwa daraja la 1-3 ikiwa ni wastani wa ufaulu wa asilimia 100.

Matokeo yaliyotangawa na Katibu Mtendaji wa baraza la Mitihani Tanzania (NECTA) Dkt. Said Mohamed ni ishara njema kwa uwekezaji  mkubwa uliofanywa na Serikali ya Jamhuri ya Muungano wa Tanzania inayoongozwa na Dkt.Samia Suluhu Hassan kwa kujenga vyumba vya Madarasa, Mabweni, kutoa ajira kwa walimu na wataalam wa Maabara, ujenzi wa maabara zenye vifaa vinavyorahisisha  na kuweka mazingira wezeshi ya kujifunza na kujifunzia.

Katika matokeo hayo yanayojumuisha wanafunzi 273, wanafunzi 33 sawa na asilimia 12 wamepata daraja la kwanza, wanafunzi 173 sawa na asilimia 63 wamepata daraja la pili, Wanafunzi 67 ambayo ni asilimia 24 wamepata daraja la tatu. Aidha, hakuna mwanafunzi aliyepata daraja la 4 ama 0

Mkurugenzi Mtendaji wa Halmashauri ya Wilaya ya Nyasa Khalid A. Khalif amewapongeza wanafunzi kwa ufaulu mzuri wa 100% na kwamba hiyo ndio tafsiri sahihi na malengo ya uwekezaji mkubwa unaofanywa na Dkt.Samia Suluhu Hassan kwenye Sekta ya elimu ambapo Mwaka 2025 Nyasa tumetekeleza kwa vitendo

Mkurugenzi Khalid amewashukuru na kuwapongeza Walimu, Wazazi/Walezi, Wenyeviti wa bodi za Shule na jamii kwa ujumla kwa kuonyesha ushirikiano uliofanikisha matokeo haya Chanya yanayoiletea heshima kubwa Wilaya ya Nyasa, Mkoa wa Ruvuma na Taifa kwa ujumla

“…Asanteni sana Walimu kwa kutimiza majukumu yenu vizuri, haya ndio malengo ya Serikali ya awamu ya sita. Mmewajibika, matokeo yameonekana” amesema Khalid