MKUU WA WILAYA YA NYASA AWATAKA WALIMU WA SEKONDARI KUFAULISHA KIDATO CHA NNE,AIPONGEZA NYASA KWETU FORUM

Posted on: August 24th, 2020

Mkuu wa Wilaya ya Nyasa Bi Isabela Chilumba  leo amefanya ziara ya kikazi katika Shule ya Sekondari ya Limbo, iliyopo Kata ya Kilosa, na Shule ya Sekondari ya Mbamba bay Iliyopo, Kata ya Mbamba bay wilayani hapa.

Ziara hiyo ina  lengo la kutatua changamoto katika shule zote za Sekondari Wilayani hapa,  ili kuongeza Ufaulu wa wanafunzi wa Kidato Cha Nne na kuwapongeza Walimu wa Sekondari ya Mbamba bay, kwa kufaulisha vizuri wanafunzi wa Kidato cha Sita.

Bi Chilumba amefafanua kuwa anachohitaji ni kuona wanafunzi wa Kidato cha nne wanafaulu kama wale wa kidato cha sita kwa kuwa walimu ni hao hao.  

Akiongea na Walimu wa Limbo Sekondari,  amewataka kufanya kazi kwa kufuata maadili ya kazi , na kuwafundisha wanafunzi kwa Upendo na kuwafuatilia,  Shuleni na Nyumbani, na kuwapa mazoezi ya mara kwa mara, ili waweze kujisomea na kujifunza wawapo shuleni na Nyumbani ili kuongeza ari ya  kujifunza.

Ametoa wito kwa Walimu wa Shule hiyo kufundisha kwa bidii na kuacha visingizio mbalimbali, kwa kuwa wao kama wataalamu wa elimu wamepelekwa mashuleni ili kuwafundisha wanafunzi , wazazi, na wanajamii kutatua changamoto ili kuleta mabadiliko katika maeneo yao ya Kazi.

Aidha amewaagiza wakaguzi wa Elimu Wilayani Nyasa kupeleka nakala ya Taarifa ya ukaguzi na kusema kuwa,  hatawavumilia walimu wazembe,  ambao hawatafaulisha kwa kuwa malengo ya kila mwalimu ni kuhakikisha wanafunzi wake wanafaulu masomo anayofundisha na kamwe hatamvumilia mwalimu mzembe

“Nawaagiza walimu wakuu na wakaguzi wa elimu wilayani hapa kwamba, hamtakiwi kuwavumilia walimu wazembe ambao hawafaulishi, kazi yao ni kutoa visingizio, hatuwezi kufikia hapo tunatakiwa kubadilika, na kuhakikisha wanafunzi wanafaulu kwa kila masomo yenu  mnayofundisha. Lakini pia tunatakiwa kuwa na malengo ya kuhakikisha kuwa wanafunzi wanafaulu kwa hali yoyote ile”.Alisema Chilumba.

Katika shule ya Sekondari ya Mbamba Bay Amewapongeza walimu wa Shule hiyo kwa kufaulisha wanafuzi wote wa Kidato cha sita na kuwataka matokeo kama hayo yapatikane kidato cha nne, na mbinu walizotumia kufundisha Kidato cha sita wazitumie kufaulisha Kidato cha nne.

Aidha amewashuru na kuwapongeza wananchi wa Wilaya ya Nyasa,  kupitia ukurasa wa kijamii wa Facebook wa  Nyasa kwetu Forum kwa kufuatilia habari za Nyasa na kuchangia kwa umakini mada zinazohusu uboreshaji wa Elimu, miundombinu,na masuala mengine ya Kijamii  Kwa Wilaya ya Nyasa.

Awali walimu hao walizitaja changamoto wanazokutana nazo ni pamoja na Kutopata ushirikiano na wazazi,  kwa kuwahamasisha wanafunzi kusoma ,kutochangia chakula na kuwafanya wanafunzi kusoma na njaa, kutembea umbali mrefu na kufika shule wakiwa wamechoka na kutomudu masomo.

Naye Mkurugenzi Mtendaji wa Halmashauri ya Wilaya ya Nyasa bw. Jimson Mhagama aliwataka walimu kuhakikisha wanafundisha na kuhakikisha wanafunzi wanafaulu ili kufikia malengo ya Wilaya ya kufaulisha wanafunzi wote wa Kidato cha Nne, kwa kutoa Elimu kwa wazazi na walezi kwa kuwa wazazi wengine hawana ufahamu juu ya kutoa ushirikiano kwa walimu ili kuinua kiwango cha Elimu Wilayani Nyasa.

Mkuu wa Wilaya ya Nyasa katika ziara hiyo aliambatana na Kamati ya Ulizi na Usalama Wilaya ya Nyasa.Mkurugenzi Mtendaji Wilaya ya Nyasa na Wakuu wa Idara za Elimu Sekondari,Elimu Msingi, Tume ya Utumishi wa Walimu, na Mkuu wa Idara ya Utawala na Raslimali Watu Bw.Liston Moyo.

Matokeo ya Kidato cha sita katika Wilaya ya nyasa 2020 wamefaulu kwa asilimia 100% kwa shule zote Mbambabay Sec. Na St. Pauls' Sec.=>Mbambabay: Div I->53, II->88, III->13, ->: 0, O->0.=>ST. PAULS: I->13, II->45, III->19, IV->0, O->0. Shule zote ufaulu wa 100%