MKUU WA WILAYA YA NYASA AKABIDHI CHETI KIPYA CHA USAJILI, WANANCHI WAMPONGEZA KWA UCHAPAKAZI WAKE

Posted on: September 5th, 2020

Mkuu wa Wilaya ya Nyasa Bi  Isabela Chilumba, jana amekabidhi Cheti cha Usajili wa Chama Kipya cha Msingi cha Ushirika wa Mazao Litindo,  ambacho kimesogeza karibu  Huduma ya kuuza mazao kwa wakulima wa Kijiji cha Litindo kata ya Luhangarasi Wilayani Nyasa, Makabidhiano  yaliyofanyika katika Viwanja vya Ofisi ya Serikali ya kijiji  cha Litindo Wilayani hapa.

Akikabidhi Cheti Cha Usajili amewataka wananchi wa Kijiji hicho, na Wilaya ya Nyasa kwa ujumla, hususani Vijana,  kuongeza uzalishaji wa zao la kahawa, kwa kuwa Ardhi  ipo ya kutosha inayostawisha zao la kahawa ili kuongeza kipato Ngazi ya kaya na Taifa kwa ujumla.

Chilumba alifafanua kuwa,  wananchi wa kijiji cha Litindo wamefurahia kupewa Cheti cha Usajili wa Chama Cha Ushirika cha Msingi, ambacho ilikuwa ni  kero ya wananchi wa kijiji hicho kwa kuwa, awali walikuwa wanasafirisha mazao yao umbali mrefu, na walikuwa wakiuza Kwenye Chama cha Luhangarasi Amcos, lakini kwa sasa watakuwa wanauza katika Chama chao ambacho kimepata usajili.

Aliongeza kuwa, wasifurahie kupata usajili tu peke yake bali waongeze uzalishaji wa zao hilo, kwa kuongeza mashamba mapya na kupanda mbegu bora za kisasa, ambazo huzalisha mazao mengi na kwa muda mfupi. Badala ya kusubiri mashamba ya kurithi peke yake. Amewaagiza Watendaji wa Kata na Kijiji kuhakikisha kila mkulima anaongeza Uzalishaji wa zao la Kahawa kwa kila Msimu wa kilimo.

“Ndugu wakulima nimewaona leo mnafurahia kupewa cheti cha Usajili wa Chama chenu, lakini furaha hiyo isiishie hapa bali iwe fursa kwenu ya kuongeza uzalishaji wa zao la kahawa hapa kijini kwenu na Wilaya ya Nyasa kwa ujumla, hasa vijana kila kijana anatakiwa kuwa na walao hekari mbili kwa kufanya hivi hata chama chenu cha ushirika kitakuwa na nguvu kwa kuwa kitakuwa na mazao mengi”.

Aidha alitoa wito kwa viongozi wa chama hicho kuwa waaminifu na waadilifu katika kutekeleza majukumu yao kwa kulinda na kutunza Fedha na mali ya Chama ili wananchi wakipende Chama chao, na kuongeza uzalishaji wa zao hilo. Pia aliwatahadharisha kuwa Serikali Wilayani hapa ipo makini na itawachukulia hatua za kisheria Viongozi wa Vyama vya Ushirika watakaohusika na Wizi au upotevu wa Fedha za wakulima.

Kwa upande wao wanachama na wakulima wa mazao Katika Kijiji hicho wamempongeza Mkuu wa Wilaya ya Nyasa kwa uchapakazi wake na kutatua Changamoto mbalimbali za Wananchi kwa haraka, na kumwomba aendelee kuwasaidia na kuwaongoza ili wazidi kupata  maendeleo, na kusema kuwa wataendelea kuongeza uzalishaji wa mazao kwa kuwa changamoto iliyokuwa inawakabili imetatuliwa.