MKUU WA WILAYA AHAMASISHA UJENZI WA KITUO CHA POLISI CHA TARAFA YA MPEPO

Posted on: July 17th, 2020

Mkuu wa Wilaya ya Nyasa Bi Isabela Chilumba, hivi karibuni amefungua rasmi  Ujenzi wa Kituo cha Polisi  cha Tarafa ya Mpepo kinachojengwa katika Kata ya Tingi Wilayani Nyasa.

Akifungua Ujenzi huo  katika eneo la ujenzi, aliwahamasisha wananchi waweze kuchangia Ujenzi huo, na  kufanya harambee ya kukusanya michango, ili kuhakikisha ujenzi unaanza kwa haraka na kukamilika ndani ya mwaka huu 2020.

Chilumba alifafanua kuwa lengo la kuhamasisha ujenzi wa kituo cha polisi katika Tarafa ya Mpepo,  ni kuimarisha Ulinzi katika maeneo ya Mpakani kwa kuwa Tarafa hiyo inapakana na Nchi Jirani ya Msumbiji, hivyo waarifu wengi wanaweza kuingia au kutoka katika Tarafa  ya Mpepo.

Aliongeza kuwa Wananchi wanatakiwa kuhamasika, kuchangia mradi  wa ujenzi wa Kituo cha Polisi Katika Tarafa ya Mpepo, ili Raia wa Tarafa hiyo na mali zao ziwe salama wakati wote ili kuleta maendeleo, katika ngazi ya kaya, na Tarafa kwa ujumla kwa kuwa Polisi watafanya kazi na watatoa Huduma kwa masaa 24 tofauti na ilivyokuwa sasa, Kituo kinachotoa Huduma ni kidogo na Polisi ni  wachache wanaofanyakazi katika Kituo Cha Polisi.

“Ndugu wananchi wa Tarafa ya Mpepo leo nimefika hapa kufungua na kuhamasisha, ujenzi huu wa kituo cha Polisi cha Tarafa hii Utaona leo Serikali ya Wilaya iko Mahali hapa, ,Mimi Mkuu wenu wa Wilaya niko Hapa na Wakuu wa Idara na Vitengo wote wa Halmashauri ya Wilaya ya Nyasa wote wako hapa kwa lengo la kuhamasisha na kuchangia ujenzi wa Kituo hiki. Lakini leo lazima tuanze rasmi ujenzi wa kituo hiki, tutakwaa na kuseti msingi na tutaanza kuchimba Msingi.Lengo la kujenga Kituo hiki ni kuimarisha Ulinzi na Usalama katika Tarafa hii kwa kuwa inapakana na Nchi jirani ya Msumbiji”. Alisema Chilumba

Wananchi wa Tarafa ya Mpepo walimpongeza Mkuu wa Wilaya ya Nyasa Bi Isabela Chilumba kwa kuhamasisha  ujenzi huo  na kumuahidi kuwa watajitoa kwa moyo na kweli wana uhitaji wa kituo hicho hivyo wameona nia ya Serikali Wilayani Nyasa ni kuona Raia wake wanaishi kwa amani hivyo watahamasisha ujenzi huo.