MGOMBEA UDIWANI CCM APITA BILA KUPINGWA.

Posted on: November 5th, 2018

Mgombea udiwani kwa tiketi ya chama cha Mapinduzi katika kata ya Mtipwili Wilaya ya Nyasa Richard Chiwalo ameshinda kiti hicho mara baada ya kupita bila kupingwa.

Kwa mujibu wa msimamizi wa uchaguzi Jimbo la Nyasa Dkt Oscar Mbyuzi aliyasema hayo jana katika Ofisi ya Mkurugenzi Mtendaji Wilaya ya Nyasa wakati akiongea na mwandishi wa habari hizi.

Dkt Mbyuzi alifafanua kuwa mgombea huyo kwa tiketi ya Chama cha Mapinduzi ameshinda kiti hicho bila kupingwa kwa kuwa hakukuwa na chama kingine chochote cha siasa kilichojitokeza katika uchaguzi huo hivyo kwa mujibu wa kanuni ya Uchaguzi namba 25 (5) hakutakuwa na uchaguzi tena kwa kuwa uchaguzi huo ulikuwa ufanyike desemba 2 mwaka huu.

Aliongeza kuwa kinachosubiriwa kwa sasa ni siku ya desemba 2 atakabidhiwa cheti chake cha ushindi na kumuapisha ili aweze kuendelea na majukumu yake ya kazi ya udiwani katika kata yake ya Mtipwili katika wilaya hii

“mgombea wa chama cha mapinduzi (ccm) ameshinda bila kupingwa na hakukuwa na mgombea mwingine hadi muda wa kuchukua fomu unakwisha kwa wagombea hivyo hatutakuwa na uchaguzi tena na tunachosubiri ni siku ya tarehe 2 Desemba tutampa cheti cha ushindi na kumuapisha ili aweze kuwatumikia wapiga kura wake”.

Richard Chiwalo alikuwa Diwani wa kata ya Mtipwili kwa tiketi ya chama cha democrasia na maendeleo (CHADEMA) na Oktoba 2 mwaka huu alijiuzuru wadhifa huo na kukihama chama hicho na kuhamia chama cha Mapinduzi kutokana na kuridhishwa na utendaji kazi wa Rais wa Jamhuri ya muungano wa Tanzania Dkt.John Magufuli na Mbunge wa Jimbo la Nyasa Ambaye pia ni Naibu Waziri wa Biashara Miundombinu na Uwekezaji Mhandisi Stella Manyanya.