Meli ya Mizigo ziwa Nyasa yatia Nanga Mbamba bay..

Posted on: September 18th, 2017

  Meli ya Mizigo ya Mv Njombe iliyozinduliwa na Waziri Mkuu Mh.Kassim Majaliwa huko Itungi Wilayani Kyela imefika kwa mara ya kwanza katika Bandari ya mji wa Mbamba bay kwa madhumuni ya kuionyesha Meli hiyo kwa Wananchi na kuwatangazia kuanza kwa safari zake na kutoa fursa kwa wafanya biashara kuanza kuitumia katika kusafirishia mizigo kwenye ziwa Nyasa kupitia bandari zote zilizoko mwambao mwa ziwa hilo nchini na nchi jirani za Malawi na Msumbiji.

Akizungumza na wananchi mbali mbali waliofurika bandarini kuitazama Meli hiyo Kiongozi wa Meli Amesema kuanza kwa safari za Meli hiyo iliyojengwa na Watanzania na kugharimu sh. bilioni 11.253 ikiwa ni utekelezaji wa ahadi ya Rais Dkt. John Magufuli alizozitoa katika Kampeni za uchaguzi mwaka 2015 inakwenda kutatua changamoto ya usafiri wa abiria na mizigo katika ziwa Nyasa na kuongeza fursa za usafirishaji wa Mizigo mikubwa kwa garama nafuu na kuifungua Mbamba bay badala ya kutegemea njia moja tu ya Mbinga.

Amesema ni jambo la faraja na la kujivunia kwa Serikali na wananchi kwa pamoja kushuhudia meli zilizotengenezwa na Mtanzania, zikiwa zimekamilika tayari kwa kuanza kazi ya kuwahudumia wananchi, ambapo awali suala hilo lilikuwa likifanywa na raia wa kigeni.

Amewaomba Wananchi kuitangaza Meli hiyo pamoja na ile ya MV.Mbeya na kuwaomba wafanya biashara kuitumia na kuhakikisha haisafiri bila kuwa na mizigo ya kutosha kwa kuwa hiki ni chombo cha Watanzania.

Wakizungumza juu ya Kufika na kuanza kazi kwa Meli hiyo yenye uwezo wa kubeba tani 1,000 Wananchi wa mji wa Mbamba bay wamesema changamoto ya usafiri wa mizigo katika ziwa Nyasa itakuwa historia kwani meli hizi zitarahisisha usafiri na kupanua wigo wa biashara kati ya Tanzania na nchi za Malawi na Msumbiji, hivyo tunamshukuru Mheshimiwa Rais Dkt. Magufuli kwa kutoa ahadi hii ambayo leo utekelezaji wake umekamilika.”