MBUNGE WA NYASA ATOA MSAADA WA BAISKELI KWA MLEMAVU.

Posted on: November 5th, 2018

Mbunge wa jimbo la Nyasa Mhandisi stella Manyanya ambaye pia ni Naibu Waziri wa Viwanda Biashara na Uwekezaji amemkabidhi baiskeli yenye thamani ya Tsh1,500,000/=( milioni moja laki tano) mlemavu wa miguu ikiwa ni ahadi yake aliyoitoa alipofanya ziara katika Kijiji cha malini kata ya Mtipwili Hivi karibuni Wilaya ya Nyasa Mkoani Ruvuma.

Baiskeli hiyo imekabidhiwa leo (05-11-2018) na Katibu wa mbunge ndugu Cosmas Nyoni Nyumbani kwa John Mapunda ambaye ni mlemavu anayeishi katika kijiji cha Malini Kata ya Mtipwili Wilayani hapa ili kumrahisishia kutembea mlemavu huyo ambaye alikuwa akitambaa.

Manyanya alifafanua kuwa kwa kushirikiana na mwanae anayeitwa Hope exaveria ambaye pia ni mlemavu aliamua kumsaidia baiskeli hiyo mlemavu huyo kwa kuwa akiwa katika ziara yake alipokuwa kijiji cha Malimi alipokea ombi la Mlemavu huyo kuomba Baiskeli kwa kuwa alikuwa anapata shida ya kutembea na kubadilishana mawazo na wenzake hivyo baiskeli itamsaidia kutembea na kubadilishana mawazo na ndugu wenzie.

Aliongeza kuwa anatambua sana ulemavu kwa kuwa ana mtoto ambaye ni mlemavu na anaona walemavu nao ni binadamu kama walivyo binadamu wengine ambao wanahitaji upendo na kuthaminiwa ikiwa ni pamoja na kusaidiwa au kutatuliwa changamoto zao.

“Nimetumwa na Mbunge Stella Manyanya ili nikuletee baiskeli ambayo ulimuomba akiwa ziarani katika kijiji hiki cha Malini kama tunavyomfahamu Mbunge wetu kila anachoahidi anakitekeleza na leo hii amekuletea kwa kushirikiana na mwanae anayeitwa Hope Exaveria ambaye naye ni mlemavu wamekubaliana kukusaidia wewe ili uweze kutembea vizuri na kubadilishana mawazo na marafiki zako na ndugu jamaa na marafiki”alisema Katibu huyo wa Mbunge.

Akipokea msaada huo ndugu John Mapunda alimshukuru sana Mbunge na kusema kuwa kabla ya kupata baiskeli hiyo alikuwa anapata shida ya kutembea kwa kuwa alikuwa anatembea kwa kutambaa kwa shida lakini mara baada ya kupata baiskeli hiyo atapata fursa ya kuwatembelea ndugu jamaa na marafiki na wakati mwingine atakuwa akibadilishana mawazo na rafiki zake kijiweni.

Mh Manyanya amekuwa na kawaida ya kuwasaidia watu wenye mahitaji maalum na hivi karibuni akiwa katika ziara ya siku nane katika Tarafa ya Mpepo Katika Kijiji cha Lunyele shule ya msingi Lunyele alitoa ushauri wa matibabu kwa watoto watatu waliozaliwa katika familia tatu tofauti  na kumwagiza Mganga mkuu  wa Wilaya ya Nyasa kwenda kuwapa ushauri wa kitaalam watoto watatu ambao walizaliwa wakiwa na vichwa vikubwa wazazi wao wakiwa hawajui cha kufanya.

Naye Mwenyekiti wa kijiji cha Malini Kata ya Mtipwili alimshukuru sana kwa kuwajali na kuwasaidi wananchi wake wenye mahitaji maalum na kumwomba aendelee na moyo huo.