MADIWANI WILAYA YA NYASA WATAKIWA KUSHIRIKIANA NA KUONGEZA MAPATO YA HALMASHAURI

Posted on: December 14th, 2020

Madiwani wa Halmashauri ya wilaya ya Nyasa wametakiwa kushirikiana na wataalamu, katika shughuli za Serikali na kuhakikisha wanahamasisha ukusanyaji wa mapato ya Halmashauri katika maeneo yao.

Wito huo umetolewa na Kaimu Katibu Tawala Wilaya ya Nyasa Bw. Paul Lugongo , wakati akifungua Baraza la Madiwani Wilaya ya Nyasa katika kikao cha kuwaapisha Madiwani hao, kilichofanyika katika Ukumbi wa Kepten John Komba Mbamba bay Wilayani Nyasa.

Bw Lugongo amewataka madiwani hao kushirikiana na wananchi, wataalamu wa Kata na Halmashauri kwa Ujumla ili waweze kuijenga Halmashauri ili iwe na Maendeleo katika Utekelezaji wa Miradi mbalimbali ya maendeleo na kuwasihi kuwa migogoro baina yao na wataalamu itasababisha kudumaa kwa maendeleo.

Aliongeza kuwa, amewataka madiwani hao kuhakikisha wanahamasisha wananchi na wataalamu kukusanya mapato ya Halmashauri ili yaweze kuongezeka ili Halmashauri iweze kuwa na Nguvu ya kutekeleza miradi mbalimbali ya maendeleo kwa makusanyo ya Ndani.

“Nichukue fursa hii kuwapongeza kwa kuchaguliwa kwenu lakini kazi iliyokuwepo mbele yenu ni kuhakikisha kuwa mnashirikiana vema na wananchi wataalamu ngazi ya Kata na Halmashauri, katika kufanya kazi na kuhamasisha Ukusanyaji wa mapato ya Halmashauri ili kipato cha mtu mmoja kiweze kukua na Halmashauri iweze kujiendesha kwa mapato ya ndani” 

Jumla ya Madiwani 28 wameapishwa na Hakimu MKazi wa Mahakama ya Mwanzo Mbamba bay Nickson Maleko.