KITUO CHA RADIO JAMII (UNYANJA FM) CHAZINDULIWA

Posted on: May 8th, 2017

Kiongozi wa Mbio za Mwenge wa Uhuru Kitaifa 2017 Bw. Amour Hamad Amour Tarehe 07-05-2017 amefanya uzinduzi rasmi wa Radio Unyanja FM na kuanza kurusha matangazo yake kutokea majengo ya Parokia ya Nangombo iliyopo katika kata ya Kilosa, Awali kituo hicho kilikuwa kikirusha matangazo yake kwa majaribio kuanzia Julay 2016

Mwenge wa uhuru umefanya uzinduzi huo ukiwa ziarani wilayani  nyasa baada ya kupokelewa kwa nderemo na vifijo huko katika kijiji cha Ukuli kata ya Kingerikiti kabla ya kusafiri zaidi ya Kilomita 41.1 na kufika hapa kijiji cha Nangombo.

Baada ya kuwasili katika eneo la uzinduzi kiongozi wa mbio za mwenge wa uhuru kitaifa mwaka 2017 alisomewa taarifa fupi ya mradi wa ujenzi wa kituo cha kurushia  matangazo cha muda na namna taratibu zote za usajiri zilivyofanyika na kukamilika. Taarifa hiyo ilisomwa na msimamizi mkuu wa kituo Bw.Patrick Kosima

Katika taarifa yake, Msimamizi wa Kituo alimweleza Kiongozi wa Mbio za Mwenge wa Uhuru kitaifa Mwaka 2017 kuwa Mwaka 2014 hadi 2017 shirika lisilokuwa la Kiserikali Agriculture and Micro-enterprise Development Organization (AGROMICRODET) kwa Kushirikiana na Halmashauri ya Wilaya ya Nyasa walianza kutekeleza Mradi wa kuanzisha Redio ya Jamii chini ya ufadhili wa shirika la Programu za maendeleo la Umoja wa Mataifa (UNDP) ambapo malengo yao ni kusikika katika maeneo ya mkoa wa Ruvuma yote japo mpaka sasa usikivu wake ni wa kiwango kizuri katika maeneo ya  Mwambao mwa ziwa Nyasa pekee, lakini jitihada zinafanywa kufikia lengo husika

Aidha lengo la kuanzishwa kwa Redio Unyanja ilikuwa ni kukidhi hitaji la wilaya ya Nyasa na Mwambao  wa ziwa la kuwa na Redio inayotangaza kwa Kiswahili kwa kuwa akukuwa na matangazo yoyote yaliyokuwa yakisikika kwa lugha ya Kiswahili katika maeneo ya ziwa Nyasa na hivyo wananchi kukosa fursa ya kuhabarishwa na Kueleimishwa katika nyanja ya Kiuchumi, Kijamii na Kisiasa hususani mpango wa Serikali ya awamu ya tano ya kuwa na uchumi wa Viwanda.

Pia katika taarifa yake alimwambia kiongozi wa Mbio za mwene wa uuru kitaifa mwaka 2017 kwamba Mpaka sasa Mradi umegharimu jumla ya fedha za kitanzania 155,000,000.00 kutoka katika vyanzo vifuatavyo -; Mchango toka kwa taasisi husika Tsh.17,500,000.00, Mchango wa Halmashauri Tsh.10,000,000 na Mchango toka kwa Wafadhili (UNDP) Tsh 127,500,000.00  ambapo fedha hizi zimetumika kwa kufanya shughuli kama Ukarabati wa majengo, Ununuzi wa vifaa vya redio, Usimikaji wa mitambo, Upatikanaji wa vibali na gharama za uendeshaji,  Aidha ujenzi wa jengo la kudumu la kurushia matangazo unatarajia kuanza huko kijiji cha kilosa.

Akizungumza na wananchi waliokusanyika katika eneo la uzinduzi na wale waliosikiliza redio Unyanja kwa wakati huo, Bw Amour hamad Amour aliitaka jamii ya Nyasa kuitumia radio Unyanja kama ngazi ya kupata habari na matukio yanayoendelea duniani kote na pia aliwaasa watangazaji na wasimamizi wa kituo hicho kuhakikisha wanarusha matangazo yale yenye maadili mema kwa taifa letu lakini pia kuwapatia wananchi habari zile zinazolenga kuwahakikishia kwenda sambamba na mawazo ya serikali ya awamu ya tano ya kuhakikisha na kuimarisha uchumi na hatimaye kufikia uchumi wa viwanda