KIKOSI KAZI CHAKAMATA WAHUJUMU

Posted on: June 18th, 2019

 Kikosi kazi maalum cha ukusanyaji wa mapato ya Halmashauri ya Wilaya ya Nyasa Mkoani Ruvuma, hivi karibuni kimewakamata wananchi wawili wa kijiji cha Kihereketi wilayani Mbinga wakiwa wanahujumu mapato ya Halmashauri katika msitu wa Lubela unaomilikiwa na Wilaya ya Nyasa.

Kwa mujibu wa Mwenyekiti wa kikosi kazi hicho, Christopher Komba, alisema kuwa tukio hilo limetokea hivi karibuni wakati alipofanya ziara ya kushitukiza akiwa na Kikosi kazi chake, katika Msitu wa Libela uliopo kijiji cha Kihereketi, Kata ya Nyoni, wilayani Mbinga ndipo alipowakamata watuhumiwa hao wakiwa wanapasua boriti na mbao bila kibali cha Wilaya ya Nyasa.

Aliwataja watuhumiwa hao kuwa ni Edward Nchimbi (40) na Antony Nchimbi (33), wote wakiwa ni wakazi wa Kijiji cha Kihereketi wilayani Mbinga, ambao alisema siku ya tukio, Kikosi kazi maalum kutembelea eneo la msitu wa Halmashauri na kwa kushtukiza na kuwakuta watu hao wakiwa wanapasua mbao na boriti za kuezekea ndipo walipoanza kufanya mahojiano nao ambapo walikiri kukata miti hiyo na kutumia kwa maslahi yao binafsi bila kibali cha Halmashauri ya Wilaya ya Nyasa.

Aliongeza kuwa baada ya kukiri, aliwakamata kwa lengo la kuwachukulia hatua kali za kisheria ikiwa ni pamoja na kuwaadhibu kwa mujibu wa sheria za Halmashauri ili iwe fundisho wengine wenye tabia ya kuiba vitega uchumi vya Halmashauri na kuifanya  Halmashauri kukosa mapato.

Aidha amewaasa wananchi wengine kutoiba vitega uchumi vya Halmashauri badala yake watoe ushirikiano ikiwa ni pamoja na kutoa taarifa kama kuna mtu yeyote anayehujumu mali za Serikali.