Kaimu Mkuu wa Wilaya ya Nyasa atambulisha Mradi wa Maji Tingi malungu,kuhudimia wakazi 9659

Posted on: December 6th, 2022

Kaimu Mkuu wa Wilaya ya  Nyasa mh.Aziza mangosongo  Tarehe 05/12/2022 amefanya Ziara ya kikazi ya Siku moja Wilayani Nyasa, na kufanya shughuli mbalimbali  katika Kata ya Kilosa, na Tingi.

Katika Kata ya Kilosa ameshiriki Upandaji miti katika Hospitali ya Wilaya ya Nyasa ili kuadhimisha  miaka 61 ya  Uhuru wa Tanzania Bara, na katika Kata ya Tingi amefunga mafunzo ya Mgambo, na kumtambulisha mkandarasi anayetekeleza Mradi wa maji wa Tingi Malungu.

Akiwa katika Kata ya Kilosa amewataka wananchi, kupanda miti na kutunza vyanzo vya maji ili kuenzi Uhuru wa Tanzania bara, na kulinda amani iliyopo katika Nchi yetu ya Tanzania. Amewapongeza wananchi wa Wilaya ya Nyasa kwa kuhamasika na kushiriki shughuli za usafi na upandaji miti katika Hospitali ya Wilaya ya Nyasa na kutoa wito kwa wananchi hao kuendelea kupanda miti katika maeneo yao, ili kulinda na kuhifadhi mazingira na Vyanzo vya maji.

Katika Kata ya Tingi amefunga mafunzo ya jeshi la akiba ambao jumla ya wahitimu 89 wamehitimu mafunzo hayo na kuwataka kutumia mafunzo waliyopewa kwa kuwa wazalendo na kuitumikia nchi yao katika shughuli za uzalishaji mali.

Amewapongeza wahitimu hao kwa kufyatua tofari 15000 (elfu kumi na tano ) kwa ajili ya miradi ya maendeleo katika shule ya Sekondari ya Tingi.

Katika Kijiji cha Malungu kata ya Tingi amemtambulisha Mkandarasi PEACE CONSTRUCTION LMTD katika mkutano wa hadhara, ambaye anajenga mradi wa maji wa Tingi Malungu utakaohudumia vijiji 2 vya Tingi na Malungu amabao unatarajia kutoa huduma ya maji safi na salama kwa wakazi 9659 mradi wenye gharama ya  Tsh 487,530,225.

Mradi huu utatekelezwa kwa muda wa miezi sita na  kazi zitakazofanyika ni ujenz wa Tank lenye Lita Laki moja  na vituo vya kuchotea maji 11 pamoja na ujenzi wa chanzo cha maji.

Mh Mangosongo amemuagiza mkandarasi kufanya kazi kwa bidii na kukamilisha mradi kwa muda uliopangwa, na kuwataka wananchi kushirikiana na Mkandarasi huyo ili aweze kutekeleza majukumu yake vizuri.

Ametoa wito kwa wananchi kutnza miundombinu  na vyanzo vya maji ili kuwa na uhakika wa maji safi na salama kwa kuwa Serikali imetoa fedha kwa ajili ya kutatua changamoto ya maji safi na salama kwa wakazi wa vjiji hivyo.

Kwa upande wao wananchi wameipongeza Serikali kwa kutatu kero ya maji katika vijiji hivyo kwa kuwa walikuwa wakitembea umbali mrefu kutafuta maji. Aidha wamempongeza Mkuu wa Wilaya ya Nyasa Mh, Aziza Mangosongo kwa kufanya zira za mara kwa mara wilayani hapa na kukagua miradi ya maendeleo.

Imeandaliwa na Netho C. Sichali

Afisa Habari ,Kitengo cha Mawasiliano,

Wilaya ya Nyasa.