HALMASHAURI YAKAMILISHA KUWAAPISHA VIONGOZI WA SERIKALI ZA MITAA

Posted on: December 1st, 2019

Halmashauri ya wilaya ya Nyasa jana imekamilisha zoezi la kuwaapisha viongozi  elfu mbili na mia moja (2100) ,  wa Serikali za Mitaa waliochaguliwa bila kupingwa katika Uchaguzi wa Serikali za Mitaa uliofanyika mwezi novemba 24 mwaka huu  Wilayani hapa.

Zoezi la kuwaapisha Viongozi hao limefanyika makao makuu ya kila kata na mh.Hakimu Mkazi wa Mahakama ya mwanzo Mbamba-bay Nickson Maleko, ndiye aliyekuwa akiwaapisha Viongozi hao Katika Tarafa ya Mpepo Wilayani hapa.

Hakimu Maleko,  aliwataka viongozi hao kufuata sheria na miongozo mbalimbali ya serikali katika kutekeleza majukumu yao na kuacha tabia ya kutoa talaka , na kugawanyisha mali za wanandoa kwa kuwa sio majukumu yao.

“Nachukua fursa hii kuwakumbusheni kuwa viongozi wa Serikali za Mitaa, hawana mamlaka ya kuachanisha ndoa au kugawanyisha mali walizochuma wanandoa. Nyie mmepewa mamlaka ya kutafuta suluhu lakini suluhu isipopatikana mnatakiwa kuwaelekeza wanandoa waende mahakamani.

Kaimu afisa uchaguzi wilaya Nyasa Onesmo Mkandawile, amewapongeza viongozi hao kwa kuapishwa na kuwaagiza kufanya kazi kwa kufuata taratibu sheria na kanuni pamoja na kuwahamasisha wananchi kutekeleza miradi mbalimbali ya maendeleo na kutatua kero za wananchi kwa kuwa wananchi wana imani kubwa na Viongozi hao.