Halmashauri ya Wilaya ya Nyasa yakamilisha,na kukabidhi, ujenzi wa madarasa 12, Dc asema Nyasa inatisha

Posted on: December 22nd, 2022

Halmashauri ya Wilaya ya Nyasa Tarehe 22/12/2022 imekamilisha ujenzi wa Vyumba 12 vya madarasa vitakavyotumiwa, na wanafunzi wa Kidato cha kwanza Wilayani hapa, na kukabidhi kwa Kaimu Mkuu wa Wilaya ya Nyasa Mh. Aziza Mangosongo, Makabidhiano  yaliyofanyika katika Shule ya Sekondari Limbo Wilayani Nyasa,

 Akipokea madarasa hayo baada ya kukagua kwa niaba ya Serikali Kaimu Mkuu wa Wilaya ya Nyasa Aziza Mangosongo amempongeza Mkurugenzi Mtendaji wa  Halmashauri ya Nyasa Ndugu Jimson Mhagama kwa kusimamia Ujenzi wa Madarasa 12 Wilayani hapa,  na kukamilisha kwa asilimia 100 kwa viwango tarajiwa.

”Nimekagua madarasa yako vizuri yanapendeza na yanafaa kwa matumizi, nakupongeza sana Mkurugenzi Mtendaji wa Halmashauri ya Nyasa kwa kusimamia vizuri ujenzi Huu wa madarasa kumi na mbili hakika unastahili pongezi”

Ameongeza kuwa kukamilika kwa madarasa hayo kutawafanya wanafunzi 4,452 waliochaguliwa kujiunga kidato cha kwanza kuwa na miundombinu bora ya kujifunzia itakayowapa wanafunzi hao ari ya kujiunga na masomo ya sekondari, wakiwa na madarasa mapya na madawati mapya.

Ametoa wito kwa jamii kuilinda na kuitunza miundombinu hiyo ili iweze kudumu kwa muda mrefu na kuhakikisha, wale wote waliochaguliwa kujiunga kidato cha kwanza 2023 Wilayani Nyasa wajiunge bila kisingizio chochote .

Awali, akiwasilisha Taarifa ya Ujenzi wa vyumba 12 vya Madarasa, Mkurugenzi Mtendaji  wa Halmashauri ya Wilaya ya Nyasa Ndugu Jimson Mhagama, amesema Halmashauri ilipokea kiasi cha shilingi Milioni 240,000,000 kwa ajili ya ujenzi wa madarasa kumi na mbili ya kidato cha kwanza 2023 kwenye shule sita ambazo ni, Luhangarasi (3) Kilumba( 1) Limbo( 3) Mnika Mbega Kata ya Mbaha( 2) Nyasa( 1) na Liparamba( 2)

Aidha amemshukuru  Rais wa Jamhuri ya Muungano wa Tanzani DKT Samia Suluhu Hassan kwa kuipa miradi ya maendeleo Wilaya ya Nyasa ili kutatua changamoto ya upungufu wa vyumba vya madarasa ya kidato cha kwanza 2023.

Imeandaliwa na Kitengo cha Mawasiliano Serikalini

Wilaya ya Nyasa.