HALMASHAURI ya Nyasa yatoa Mafunzo ya miradi ya ajira za muda kwa Walengwa TASAF

Posted on: April 20th, 2022

Halmashauri ya Wilaya ya Nyasa Tarehe 20.04.2022, imeanza kutoa mafunzo  kwa Wataalam wa Kisekta yenye lengo la kuwajengea Uwezo wa Uibuaji wa Miradi ya Ajira ya Muda  kwa walengwa, chini ya Mpango wa kunusuru kaya maskini TASAF Awamu ya Tatu kipindi cha pili, na Uendelezaji wa Miundombinu kwa Wilaya ya Nyasa.

Mafunzo haya yanafanyika katika Ukumbi wa Kepten John Komba ,Mbamba bay Wilayani Nyasa, na kushirikisha Washiriki 46 kwa siku sita, kutoka Sekta za kilimo ,Maji,maendeleo ya Jamii,misitu ,Mifugo , Uvuvi, maji, barabara.

Akifungua Mafunzo hayo Mkurugenzi Mtendaji wa Halmashauri ya Wilaya ya Nyasa Ndugu Jimson Mhagama, amewataka washiriki kujifunza kwa  kusikiliza vizuri mafunzo wanayopewa, ambayo yatawajengea uwezo wa kwenda kutekeleza majukumu yao na kutoa huduma bora kwa wananchi

Ameongeza kuwa wananchi wanahitaji wapewe elimu nzuri, ili waweze kuibua miradi itakayowapa maendeleo na Washiriki hao wakawafundishe wananchi kuibua miradi ili waweze kupambana na umaskini.

Awali akitoa Taarifa ya Mafunzo hayo kwa niaba ya Mkurugenzi Mtendaji wa TASAF Bw Ladislaus Mwamanga, Mwezeshaji Dismas John amesema Lengo la Mafunzo ni Kujenga Timu ya Wataalam wa kisekta mbalimbali ili waweze kuibua,kuandaa, kutekeleza na kusimamia  Miradi ya kutoa ajira za muda kwa Walengwa wa TASAF, ili kuhakikisha uandaaji na utekelezaji wa miradi unazingatia viwango vya kisekta na ubora unaokubalika.

Aidha amesema, Lengo la Miradi ya kutoa ajira za Muda inalenga kutoa ajira kwa kaya maskini wakati wa kipindi cha hali ya wanakaya hao, wasiwaze kuuza raslimali walizonazo kwa ajili ya kupata fedha, kuwezesha Miundombinu ya jamii, kuwezesha ujira wa kaya utakaowasaidia kuongeza kipato na kupunguza Umaskini.Walengwa watakaoshiriki utekelezaji watapata Ujuzi kupitia Miradi itakayotekelezwa na sifa ya kaya zitakazoshiriki utekelezaji wa miradi hii ni zenye watu wenye uwezo wa kufanya kazi na wenye umri wa kuanzia miaka 18 hadi 65.