HALMASHAURI YA NYASA YATOA MAFUNZO TARAFA YA MPEPO

Posted on: June 26th, 2020

Halmashauri ya Wilaya ya Nyasa,  imeendelea  kutoa mafunzo ya afya kwa Maafisa Elimu kata,Walimu wakuu na Walimu wa Taaluma kwa Tarafa ya Mpepo, mafunzo yanayofanyika Shule ya  Sekondari Tingi Wilayani Nyasa.

Lengo la mafunzo hayo ni kuandaa na kuweka mazingira wezeshi, ya uthibiti wa maambukizi ya Ugonjwa wa Corona, katika Shule za Msingi, ikiwa ni maandalizi ya kufungua shule juni 29 mwaka huu.Mada zilizofundishwa ni pamoja na maandalizi ya mazingira kwenye Taasisi za elimu, uchunguzi wa afya, usafiri wa kwenda na kurudi shuleni na mazingira ya kujifunzia, mada zilizotolewa na watalamu wa afya kutoka  Wilayani Nyasa.

Pamoja na mafunzo hayo Afisa Elimu Msingi Wilaya ya Nyasa Bw. Saidi Kalima anatumia mafunzo hayo  kuwakumbusha majukumu yao walimu, na amewataka kufundisha kwa bidii na kumaliza mada walizotakiwa kufundisha kwa mwaka huu ili wanafunzi wafaulu kwa asilimia mia moja.

Aidha amefuta Ruhusa zote kwa walimu mpaka mwezi Desemba mwaka huu na kufafanua kuwa ruhusa ziatakazotolewa ni za ugonjwa na kifo. Mafunzo hayo yanaendelea kutolewa leo katika  Tarafa ya Ruhekei wilayani hapa na yatafanyika shule ya msingi Mbamba-bay.