HALMASHAURI ya Nyasa yakamilisha ujenzi wa Vyumba 54 yakabidhi kwa Dc

Posted on: December 26th, 2021

Halmashauri  ya Wilaya ya Nyasa imekamilisha ujenzi wa madarasa 54, na kuyakabidhi kwa Mkuu wa Wilaya ya Nyasa Kanali Laban Thomas leo tarehe 26.12.2020.

Hafla ya kukabidhi madarasa haya imefanyika katika shule ya Sekondari Mango iliyopo Kata ya Kihagara Wilayani Nyasa, na Mkurugenzi Mtendaji Wilaya ya Nyasa Ndugu Jimson Mhagama ndiye, amemkabidhi Mkuu wa Wilaya ya Nyasa Kanali Laban Thomas,  madarasa hayo, ambayo yamejengwa, ikiwa ni utekelezaji wa Mpango wa maendeleo kwa ustawi wa Taifa na mapambano dhidi ya UVIKO 19 , kwa lengo la kutatua changamoto ya miundombinu ya elimu katika shule za Sekondari na vituo shikizi kwa shule za msingi.

Akizungumza wakati akipokea Madarasa hayo, Mkuu wa Wilaya ya Nyasa, amempongeza Mkurugenzi Mtendaji wa Halmashauri ya Nyasa na wataalam kwa usimamizi bora wa Miradi hiyo, ikiwa imekamilika kwa asilimia 99 ikiwa kwenye viwango bora.

Ameongeza kuwa Madarasa hayo pamoja na uboreshaji wa miundombinu ya Elimu ikiwemo samani (viti na meza) utasaidia kupunguza na kumaliza changamoto za Miundombinu, pamoja na utoro kwa wanafunzi na kuongeza idadi ya wanafunzi watakaofanya vizuri katika masomo.

Ametoa Rai kwa jamii kutunza miundombinu hiyo na kuhakikisha wanafunzi wote waliochaguliwa kujiunga na masomo ya kidato cha kwanza wanajiunga, na atawachukulia hatua kali za kisheria wazazi na wanafunzi ambao hawatajiunga na masomo kwa kuwa serikali imeshajenga Miundombinu ya majengo na madawati.

Awali akitoa Taarifa fupi ya makabidhiano Mkurugenzi Mtendaji wa Halmashauri ya Wilaya ya Nyasa Ndugu Jimson Mhagama amesema Utekelezaji wa miradi ya ujenzi wa vyumba 54 vya Madarasa shule za Msingi na Sekondari umefikia asilimia 99 katika Halmashauri ya Nyasa na Utekelezaji wa Mradi huu umetatua changamoto kubwa ya upungufu wa miundombinu ya madarasa na madawati kwa kuwa Halmashauri ya Nyasa Mapato yake ya ndani ni Bilioni 1.2 hivyo isingeweza kutekeleza miradi hii kwa pesa zake za ndani.

Aidha amempongeza Rais wa Jamhuri ya Muungano wa Tanzania Mh,Samia Suluhu Hassan kwa kuipa Nyasa fedha za kujenga miundombinu hii ya Madarasa na Madawati.