MBUNGE WA JIMBO LA NYASA Eng.STELLA MANYANYA AKABIDHI VIFAA VYA KUTOLEA HUDUMA ZA AFYA WILAYANI NYASA.

Posted on: May 8th, 2017

Mbunge wa Jimbo la Nyasa na Naibu Waziri wa Elimu,Sayansi, Teknolojia na Mafunzo ya Ufundi Eng. Stella Manyanya  amekabidhi vifaa vya msaada kwa ajili ya vituo vya kutolea huduma za afya  wilayani Nyasa, Vifaa vilivyokabidhiwa ni pamoja na utrasound, Vitanda Vya kisasa vya kujifungulia na  kupumzikia, wool chair(viti vya kusukuma wagonjwa),Kompyuta seti 20 pamoja na vifaa vingine vya afya.

Katika hadhara hiyo ambayo pia ilihudhuriwa na Kaimu Mkuu wa wilaya ya Nyasa Bw. Juma Homera, Mkurugenzi Mtendaji wilaya ya Nyasa Dkt.Oscar Mbyuzi, Katibu wa Chama cha mapinduzi Wilaya na Mbunge wa Viti maalum Bi.Sikudhani Chikambo,  Mh. Manyanya aliwashukuru Wahisani waliowezesha upatikanaji wa vifaa hivyo muhimu kwa ajili ya afya za wananchi wa Nyasa kwa kuwa uwepo wa vifaa hivyo unapelekea sasa huduma za upasuaji kuanza kutolewa katika kituo cha afya cha Mbamba bay na hivyo kuwaondolea usumbufu mkubwa wananchi wa nyasa hasa Wanawake wajawazito.

Nae Kaimu Mkuu wa Wilaya ya Nyasa Bw.Juma Homera  aliwasisitiza wahudumu wa afya pamoja na wagonjwa kutumia vifaa hivyo kwa uangalifu na umakini  ili viweze kutumika kwa muda mrefu na kuwa suruhisho la tatizo katika vituo vya afya.

Aidha Mkurugenzi Mtendaji Wilaya ya Nyasa aliahidi kuhakikisha kuwa vifaa hivyo vitatumika kwa umakini na uangalifu Mkubwa  na kuwasisitiza Madaktari, Manesi ,wahudumu wa Afya na Wagonjwa kuunga mkono jambo hili.

Sambamba na hili Mh Mbunge wa Nyasa alisisitiza wananchi wa Nyasa kuweka mazingira safi kwa kauli mbiu isemayo ‘NYASA MARIDADI’  ili kujiepusha na maradhi. Aidha wananchi wa Nyasa wamefurahishwa sana na huduma wanazoenda kuzipata baada ya kuletewa vifaa katika vituo vya afya , pia wamehamasika kwa kiasi kikubwa  na kauli mbiu hii ambayo itakuwa ni chachu ya usafi katika mazingira ya Nyasa.