DED Nyasa wataka watumishi wa Afya kutoa Huduma Bora kwa wananchi

Posted on: September 4th, 2024

Mkurugenzi Mtendaji wa Halmashauri ya Wilaya ya Nyasa Bw. Khalid Khalif amewataka Watumishi wa Afya kutoa Huduma Bora kwa wananch,i kwa kuwahudumia na kutumia Mfumo wa GOTHOMIS katika Vituo vyote vya kutolea Huduma za Afya Wilayani hapa.

Ameyasema hayo Tarehe 04/09/2024 akiwa katika ziara ya kikazi ya kutembelea na kukagua miradi ya maendeleo, kusikiliza na kutatua kero za  watumishi katika Kituo cha Afya Mbamba bay, Kihagara na Zahanati ya Mbuyula.

Bw Khalif amefafanua kuwa watumishi wa Sekta ya Afya ni wafanyakazi muhimu sana wanaotatua kero za wananchi, katika sekta hiyo ni muhimu wawe wakarimu,wanaomsikiliza mteja,na kutatua changamoto zinazowakabili wananchi ili maendeleo yaweze kukua.

“Nachukua fursa hii kuwasihi watumishi wenzangu, kuwahudumia wananchi kwa viwango vya hali ya juu, ili kuchochea maendeleo, hivyo basi ninawaagiza mtoe huduma bora kwa wananchi na wananchi wafurahie huduma zenu kwa kuwa tumeajiriwa kuwatumikia wananchi hawa”.

Ameongeza kuwa wananchi wanapofika katika Vituo vya afya wapokelewe na wahudumiwe Vizuri kwa lengo la kutoa huduma bora na kupunguza malalamiko ya wananchi.

Hata hivyo amemwagiza Mganga mkuu wa Halmashauri ya Wilaya ya Nyasa Dkt John Mrina kuhakikisha huduma zote za afya zinatolewa kwa Mfumo wa GOTHOMIS kuanzia mteja anapopokelewa hadi anapoishia.

Aidha amewaambia Watumishi, Serikali inaendelea kutatua changamoto zinazowakabili hivyo amewataka kuendelea kutoa huduma bora kwa wanachi wakati serikali inaendelea kutatua changamoto mbalimbali.

Amekagua Vituo vyote kuanzia mapokezi,Chumba cha Daktari,Maabara Wodi na Stoo za dawa pamoja na Duka la Dawa ili kujiridhisha na huduma zinazotolewa katika vituo hivyo.