DED NYASA awataka Watumishi kukusanya mapato ili kutatua changamoto za kimaslahi

Posted on: February 8th, 2024

MKURUGENZI Mtendaji wa Halmashauri ya Wilaya ya Nyasa, Bw.Khalid Khalif amewataka watumishi wa Umma kushiriki zoezi la ukusanyaji mapato ya ndani ya Halmashauri na kuziba mianya ya utoroshaji mapato, ili kukusanya na kuongeza mapato ili aweze kuwalipa stahiki zao za kiutumishi.

Ameyasema hayo Tarehe 07/02/2024 katika kikao cha baraza la Wafanyakazi kilichofanyika Ukumbi wa Halmashauri ya wilaya ya Nyasa na kuhudhuriwa na viongozi wa vyama vya wafanyakazi,Wakuu wa Idara na wawakilishi wa  Wafanyakazi.

Bw. Khalid amefafanua kuwa ili Halmashauri iweze kuwalipa Stahiki wafanyakazi, inategemea kukusanya mapato ya Ndani, hivyo ni wajibu wa kila mtumishi  kuhakikisha mapato ya Ndani yanakusanywa na kuziba mianya ya utoroshaji mapato ya ndani ili fedha inapokusanywa kikamilifu Mkurugenzi alipe stahiki za wafanyakazi za Likizo,safari na uhamisho na matibabu.

“Suala la kukusanya mapato ya ndani ni la kwetu sote watumishi, na hakuna anayependa mtumishi asilipwe stahiki zake, Niseme tu kwamba kila mtumishi popote alipo ahakikishe anakusnya mapato kwa kutoa taarifa mbalimbali zitakazoleta fursa ya kukusanya na kuziba mianya ya kutorosha mapato. Na kila Mtumishi anatakiwa kujua kuwa tegemeo kubwa la ulipaji stahiki tunategemea makusanyo ya mapato ya Ndani.”

Bw.Khalif amewapongeza watendaji wa Kata na Vijiji kwa kazi nzuri ya kukusanya mapato ya ndani kwa kuwa mpaka sasa wamekusanya asilimia 92 ya mapato ya ndani ambapo ni Bilioni 1.4 , wamefanya kazi nzuri na kubwa lakini  amewataka kuongeza juhudi zaidi, ili kufikia malengo ya kukusanya Bilioni 2.4 kwa mwaka wa fedha 2024/2025.Aidha kwa mwaka 2023/2024 bajeti ya Halmashuri ya Nyasa ya mapato ya Ndani nai tsh Bilioni 1.4 na kuweka bajeti ya tsh million 40 pekee kulipa madeni ya Watumishi na deni ambalo watumishi wanadaii ni billion 1.2.

Amewataka Watumishi kuendelea kufanya kazi kwa Juhudi na maarifa na kujiinua kazi zao kwa kutoa huduma bora kwa wananchi.

Kwa upande wake Baraza la wafanyakazi wa Halmashauri ya Nyasa limempongeza mkurugenzi Mtendaji Wilaya ya Nyasa Bw. Khalid Khalif kwa mikakati ya kulipa Stahiki za wafanyakazi, na kupandisha kiwango cha kulipa watumishi hodari wa mwaka hadi shilingi laki tano kutoka Laki mbili, Hali ambayo imewahamasisha na kuongeza hali ya  kufanya kazi kwa bidii.