DED Nyasa awataka walimu kufundisha kwa bidii,aahidi kutoa motisha kwa watakaofaulisha kiwango Cha A

Posted on: May 18th, 2024

Yaliyojiri Ziara ya Mkurugenzi Mtendaji Wilaya ya Nyasa , Bw.Khalid Khalif katika Kata ya Chiwanda na Mtipwili.

Mkurugenzi Mtendaji wa Halmashauri Wilaya ya Nyasa Bw.khalid Khalif akiwa ameambatana na baadhi ya wakuu wa Divisheni, amefanya ziara ya kikazi katika Kata 2 ya Chiwanda na Mtipwili wilayani hapa tarehe 18/05/2024.

Lengo la ziara hiyo ni kukagua miradi ya maendeleo,kuzungumza na watumishi Ili kusikiliza na kutatua kero za watumishi na wananchi.

Akiwa katika Kata hizo amewapongeza watumishi kwa kazi nzuri wanazofanya na amewataka walimu kufanya kazi kwa bidii ya kufundisha na kuhakikisha wanapandisha ufaulu wa wanafunzi katika shule zao.

Aidha amesema Serikali inaendelea kutatua changamoto zinazowakabili katika maeneo yao, hivyo amewataka kushirikiana na wananchi Ili kutatua changamoto kwa kuibua miradi na kuanza kuitekeleza na Kisha Serikali kumalizia.

Baadhi ya kero ambazo ziliibuliwa ni upungufu wa walimu, upungufu wa nyumba za watumishi na ukosefu wa barabara baadhi ya maeneo na umeme katika Kata ya Chiwanda,ambapo mkurugenzi amesema atashirikiana na mamlaka husika kutatua changamoto hizi.

Amesema atatoa motisha kwa walimu watakaofaulisha kwa kiwango Cha A.