Ded Nyasa awahamasisha wananchi kushiriki kikamilifu utekelezaji miradi

Posted on: February 17th, 2025

Mkurugenzi Mtendaji wa Halmashauri ya Wilaya ya Nyasa Bw. Khalid Khalif tarehe 16/02/2025 amewataka wananchi kushiriki kikamilifu katika ujenzi wa miradi ya maendeleo inayotekelezwa katika maeneo yao.

 Ameyasema hayo katika kijiji cha Uhuru, Kata ya Mipotopoto Tarafa ya Mpepo wilayani Nyasa,  akiwa katika ziara yenye lengo la kukagua Miradi ya maendeleo na kusikiliza na kutatua kero za wananchi.

Bw. Khalid amefafanua kuwa ili miradi itekelezwe vizuri wananchi wanatakiwa kushiriki katika utekelezaji wa miradi, ili kuwajengea umiliki na kusimamia vizuri miradi hiyo ikiwa ni pamoja na kufanya kazi mbalimbali kama kubeba mawe, kuchimba mchanga na kazi zingine ambazo jamii zinatakiwa kufanya.

“Ndugu wananchi nimefika nleo katika kijiji hiki kwa lengo la kukagua miradi ya maendeleo na kuona kwa macho mmefikia hatua gani. Binafsi nawapongeza nimeona maji ya bomba mmeleta eneo la ujenzi mawe yameanza kuja, na usafi unaendelea hii ni jinsi ambavyo mnaonyesha ni jinsi gani mko tayari kutekeleza mradi wa  ujenzi wa shule yetu ya msingi Uhuru.”

Aidha amewapongeza wananchi kwa kuitikia na kuwa tayari kutekeleza mradi huu kwa kuwa serikali imetoa tsh milioni 331 kwa ajili ya kutekeleza mradi huu na kuwataka kusimamia vivaa vyote vitumike vizuri kwa kutekeleza mradi na kusitokee wizi wa aina yoyote ikiwa ni pamoja na kumaliza kwa wakati.

Kwa upande wake wananchi wa Kijiji cha Uhuru wameishukuru Serikali kwa kutoa fedha za kutekeleza maradi huu na kuahidi watasimamia vizuri na kumaliza kwa wakati.

Miradi mingine iliyotembelewa na Mkurugenzi Khalid ni Mradi wa ukamilishaji wa madarasa Shule ya Seekondari shirikisho ambayo amemtaka fundi kuongeza kasi ya ujenzi kwa kuleta mafundi wengine na kumaliza mradi haraka, na ujenzi wa Daraja la Mto Ruvuma linalounganisha Wilaya ya Songea na Wilaya ya Nyasa.